Jonathan Slocum, Interim Director :: PCL 5.112, 1 University Station S5490 :: Austin, TX 78712 :: 512-471-4566

LRC Links: Home | About | Books Online | EIEOL | IE Doc. Center | IE Lexicon | IE Maps | IE Texts | Pub. Indices | SiteMap

Rigveda, Book 9

Metrically Restored Text

Karen Thomson and Jonathan Slocum

---

N.B. An earlier version of this text was published in electronic form as:

RIG VEDA, A METRICALLY RESTORED TEXT, edited by Barend A. van Nooten and Gary B. Holland, Harvard Oriental Series, vol. 50.

That electronic text, itself derived from a much earlier UT Linguistics Research Center electronic text, bore the legend:

Copyright with the authors and Harvard Oriental Series. The electronic text may be used for research but not for commercial purposes.

Our use here is for research. The electronic text has been much revised (see our Introduction) and converted to Unicode/HTML in this online edition; re: the significance of color and smaller type size in particular, see the Popular Rigveda. Copyright to all revisions and HTML tagging is assigned to the University of Texas, though responsibility for content lies with the authors. This HTML edition may be used for research but not for commercial purposes.

---

9.001.01a     svā^́diṣṭhayā mádiṣṭhayā
9.001.01b     pávasva soma dhā^́rayā
9.001.01c     índrāya pā^́tave sutáḥ

9.001.02a     rakṣohā^́ viśvácarṣaṇir
9.001.02b     abhí yónim áyohatam
9.001.02c     drúṇā sadhástham ā^́sadat

9.001.03a     varivodhā^́tamo bhava
9.001.03b     máṃhiṣṭho vr̥trahántamaḥ
9.001.03c     párṣi rā^́dho maghónãm

9.001.04a     abhí arṣa mahā^́nãṃ
9.001.04b     devā^́nāṃ vītím ándhasā
9.001.04c     abhí vā^́jam utá śrávaḥ

9.001.05a     tuvā^́m áchā carāmasi
9.001.05b     tád íd árthaṃ divé-dive
9.001.05c     índo tuvé na āśásaḥ

9.001.06a     punā^́ti te parisrútaṃ
9.001.06b     sómaṃ sū^́ryasya duhitā^́
9.001.06c     vā^́reṇa śáśvatā tánā

9.001.07a     tám īm áṇvīḥ samaryá ā^́
9.001.07b     gr̥bhṇánti yóṣaṇo dáśa
9.001.07c     svásāraḥ pā^́riye diví

9.001.08a     tám īṃ hinvanti agrúvo
9.001.08b     dhámanti bākuráṃ dŕ̥tim
9.001.08c     tridhā^́tu vāraṇám mádhu

9.001.09a     abhī^́mám ághniyā utá
9.001.09b     śrīṇánti dhenávaḥ śíśum
9.001.09c     sómam índrāya pā^́tave

9.001.10a     asyéd índro mádeṣu ā^́
9.001.10b     víśvā vr̥trā^́ṇi jighnate
9.001.10c     śū^́ro maghā^́ ca maṃhate



9.002.01a     pávasva devavī^́r áti
9.002.01b     pavítraṃ soma ráṃhiyā
9.002.01c     índram indo vŕ̥ṣā^́ viśa

9.002.02a     ā^́ vacyasva máhi psáro
9.002.02b     vŕ̥ṣendo dyumnávattamaḥ
9.002.02c     ā^́ yóniṃ dharṇasíḥ sadaḥ

9.002.03a     ádhukṣata priyám mádhu
9.002.03b     dhā^́rā sutásya vedhásaḥ
9.002.03c     apó vasiṣṭa sukrátuḥ

9.002.04a     mahā^́ntaṃ tvā mahī^́r ánu
9.002.04b     ā^́po arṣanti síndhavaḥ
9.002.04c     yád góbhir vāsayiṣyáse

9.002.05a     samudró apsú māmr̥je
9.002.05b     viṣṭambhó dharúṇo diváḥ
9.002.05c     sómaḥ pavítre asmayúḥ

9.002.06a     ácikradad vŕ̥ṣā hárir
9.002.06b     mahā^́n mitró ná darśatáḥ
9.002.06c     sáṃ sū^́riyeṇa rocate

9.002.07a     gíras ta inda ójasā
9.002.07b     marmr̥jyánte apasyúvaḥ
9.002.07c     yā^́bhir mádāya śúmbhase

9.002.08a     táṃ tvā mádāya ghŕ̥ṣvaya
9.002.08b     ulokakr̥tnúm† īmahe
9.002.08c     táva práśastayo mahī^́ḥ

9.002.09a     asmábhyam indav indrayúr
9.002.09b     mádhvaḥ pavasva dhā^́rayā
9.002.09c     parjányo vr̥ṣṭimā^́m̐ iva

9.002.10a     goṣā^́ indo nr̥ṣā^́ asi
9.002.10b     aśvasā^́ vājasā^́ utá
9.002.10c     ātmā^́ yajñásya pūrviyáḥ



9.003.01a     eṣá devó ámartiyaḥ
9.003.01b     parṇavī^́r iva dīyati
9.003.01c     abhí dróṇāni āsádam

9.003.02a     eṣá devó vipā^́ kr̥tó
9.003.02b     áti hvárāṃsi dhāvati
9.003.02c     pávamāno ádābhiyaḥ

9.003.03a     eṣá devó vipanyúbhiḥ
9.003.03b     pávamāna r̥tāyúbhiḥ
9.003.03c     hárir vā^́jāya mr̥jyate

9.003.04a     eṣá víśvāni vā^́riyā
9.003.04b     śū^́ro yánn iva sátvabhiḥ
9.003.04c     pávamānaḥ siṣāsati

9.003.05a     eṣá devó ratharyati
9.003.05b     pávamāno daśasyati
9.003.05c     āvíṣ kr̥ṇoti vagvanúm

9.003.06a     eṣá víprair abhíṣṭuto
9.003.06b     apó devó ví gāhate
9.003.06c     dádhad rátnāni dāśúṣe

9.003.07a     eṣá dívaṃ ví dhāvati
9.003.07b     tiró rájāṃsi dhā^́rayā
9.003.07c     pávamānaḥ kánikradat

9.003.08a     eṣá dívaṃ ví ā^́sarat
9.003.08b     tiró rájāṃsi áspr̥taḥ
9.003.08c     pávamānaḥ suadhvaráḥ

9.003.09a     eṣá pratnéna jánmanā
9.003.09b     devó devébhiyaḥ sutáḥ
9.003.09c     háriḥ pavítre arṣati

9.003.10a     eṣá u syá puruvrató
9.003.10b     jajñānó janáyann íṣaḥ
9.003.10c     dhā^́rayā pavate sutáḥ



9.004.01a     sánā ca soma jéṣi ca
9.004.01b     pávamāna máhi śrávaḥ
9.004.01c     áthā no vásyasas kr̥dhi

9.004.02a     sánā jyótiḥ sánā súvar
9.004.02b     víśvā ca soma saúbhagā
9.004.02c     áthā no vásyasas kr̥dhi

9.004.03a     sánā dákṣam utá krátum
9.004.03b     ápa soma mŕ̥dho jahi
9.004.03c     áthā no vásyasas kr̥dhi

9.004.04a     pávītāraḥ punītána
9.004.04b     sómam índrāya pā^́tave
9.004.04c     áthā no vásyasas kr̥dhi

9.004.05a     tváṃ sū^́riye na ā^́ bhaja
9.004.05b     táva krátvā távotíbhiḥ
9.004.05c     áthā no vásyasas kr̥dhi

9.004.06a     táva krátvā távotíbhir
9.004.06b     jiyók paśyema sū^́riyam
9.004.06c     áthā no vásyasas kr̥dhi

9.004.07a     abhí arṣa suāyudha
9.004.07b     sóma dvibárhasaṃ rayím
9.004.07c     áthā no vásyasas kr̥dhi

9.004.08a     abhí arṣā^́napacyuto
9.004.08b     rayíṃ samátsu sāsahíḥ
9.004.08c     áthā no vásyasas kr̥dhi

9.004.09a     tuvā^́ṃ yajñaír avīvr̥dhan
9.004.09b     pávamāna vídharmaṇi
9.004.09c     áthā no vásyasas kr̥dhi

9.004.10a     rayíṃ naś citrám aśvínam
9.004.10b     índo viśvā^́yum ā^́ bhara
9.004.10c     áthā no vásyasas kr̥dhi


9.005.01a     sámiddho viśvátas pátiḥ
9.005.01b     pávamāno ví rājati
9.005.01c     prīṇán vŕ̥ṣā kánikradat

9.005.02a     tánūnápāt pávamānaḥ
9.005.02b     śŕ̥ṅge śíśāno arṣati
9.005.02c     antárikṣeṇa rā^́rajat

9.005.03a     īḷéniyaḥ pávamāno
9.005.03b     rayír ví rājati dyumā^́n
9.005.03c     mádhor dhā^́rābhir ójasā

9.005.04a     barhíḥ prācī^́nam ójasā
9.005.04b     pávamāna str̥ṇán háriḥ
9.005.04c     devéṣu devá īyate

9.005.05a     úd ā^́tair jihate br̥hád
9.005.05b     dvā^́ro devī^́r hiraṇyáyīḥ
9.005.05c     pávamānena súṣṭutāḥ

9.005.06a     suśilpé br̥hatī^́ mahī^́
9.005.06b     pávamāno vr̥ṣaṇyati
9.005.06c     náktoṣā^́sā ná darśaté

9.005.07a     ubhā^́ devā^́ nr̥cákṣasā
9.005.07b     hótārā daíviyā huve
9.005.07c     pávamāna índro vŕ̥ṣā

9.005.08a     bhā^́ratī pávamānasya
9.005.08b     sárasvatī íḷā mahī^́
9.005.08c     imáṃ no yajñám ā^́ gaman
9.005.08d     tisró devī^́ḥ supéśasaḥ

9.005.09a     tváṣṭāram agrajā^́ṃ gopā^́m
9.005.09b     puroyā^́vānam ā^́ huve
9.005.09c     índur índro vŕ̥ṣā háriḥ
9.005.09d     pávamānaḥ prajā^́patiḥ

9.005.10a     vánaspátim pavamāna
9.005.10b     mádhvā sám aṅgdhi dhā^́rayā
9.005.10c     sahásravalśaṃ háritam
9.005.10d     bhrā^́jamānaṃ hiraṇyáyam

9.005.11a     víśve devāḥ svā^́hākr̥tim
9.005.11b     pávamānasya ā^́ gata
9.005.11c     vāyúr bŕ̥haspátiḥ sū^́ryo
9.005.11d     agnír índraḥ sajóṣasaḥ


9.006.01a     mandráyā soma dhā^́rayā
9.006.01b     vŕ̥ṣā pavasva devayúḥ
9.006.01c     ávyo vā^́reṣu asmayúḥ

9.006.02a     abhí tyám mádiyam mádam
9.006.02b     índav índra íti kṣara
9.006.02c     abhí vājíno árvataḥ

9.006.03a     abhí tyám pūrviyám mádaṃ
9.006.03b     svānó° arṣa pavítra ā^́
9.006.03c     abhí vā^́jam utá śrávaḥ

9.006.04a     ánu drapsā^́sa índava
9.006.04b     ā^́po ná pravátāsaran
9.006.04c     punānā^́ índram āśata

9.006.05a     yám átyam iva vājínam
9.006.05b     mr̥jánti yóṣaṇo dáśa
9.006.05c     váne krī^́ḷantam átyavim

9.006.06a     táṃ góbhir vŕ̥ṣaṇaṃ rásam
9.006.06b     mádāya devávītaye
9.006.06c     sutám bhárāya sáṃ sr̥ja

9.006.07a     devó devā^́ya dhā^́rayā
9.006.07b     índrāya pavate sutáḥ
9.006.07c     páyo yád asya pīpáyat

9.006.08a     ātmā^́ yajñásya ráṃhiyā
9.006.08b     suṣvāṇáḥ pavate sutáḥ
9.006.08c     pratnáṃ ní pāti kā^́viyam

9.006.09a     evā^́ punāná indrayúr
9.006.09b     mádam madiṣṭha vītáye
9.006.09c     gúhā cid dadhiṣe gíraḥ


9.007.01a     ásr̥gram índavaḥ pathā^́
9.007.01b     dhármann r̥tásya suśríyaḥ
9.007.01c     vidānā^́ asya yójanam

9.007.02a     prá dhā^́rā mádhvo agriyó
9.007.02b     mahī^́r apó ví gāhate
9.007.02c     havír havíṣṣu vándiyaḥ

9.007.03a     prá yujó vācó agriyó
9.007.03b     vŕ̥ṣā^́va cakradad váne
9.007.03c     sádmābhí satyó adhvaráḥ

9.007.04a     pári yát kā^́viyā kavír
9.007.04b     nr̥mṇā^́ vásāno árṣati
9.007.04c     súvar vājī^́ siṣāsati

9.007.05a     pávamāno abhí spŕ̥dho
9.007.05b     víśo rā^́jeva sīdati
9.007.05c     yád īm r̥ṇvánti vedhásaḥ

9.007.06a     ávyo vā^́re pári priyó
9.007.06b     hárir váneṣu sīdati
9.007.06c     rebhó vanuṣyate matī^́

9.007.07a     sá vāyúm índram aśvínā
9.007.07b     sākám mádena gachati
9.007.07c     ráṇā yó asya dhármabhiḥ

9.007.08a     ā^́ mitrā^́váruṇā bhágam
9.007.08b     mádhvaḥ pavanta ūrmáyaḥ
9.007.08c     vidānā^́ asya śákmabhiḥ

9.007.09a     asmábhyaṃ rodasī rayím
9.007.09b     mádhvo vā^́jasya sātáye
9.007.09c     śrávo vásūni sáṃ jitam


9.008.01a     eté sómā abhí priyám
9.008.01b     índrasya kā^́mam akṣaran
9.008.01c     várdhanto asya vīríyam

9.008.02a     punānā^́saś camūṣádo
9.008.02b     gáchanto vāyúm aśvínā
9.008.02c     té no dhāntu suvī^́riyam

9.008.03a     índrasya soma rā^́dhase
9.008.03b     punānó hā^́rdi codaya
9.008.03c     r̥tásya yónim āsádam

9.008.04a     mr̥jánti tvā dáśa kṣípo
9.008.04b     hinvánti saptá dhītáyaḥ
9.008.04c     ánu víprā amādiṣuḥ

9.008.05a     devébhyas tvā mádāya káṃ
9.008.05b     sr̥jānám áti meṣíyaḥ
9.008.05c     sáṃ góbhir vāsayāmasi

9.008.06a     punānáḥ kaláśeṣu ā^́
9.008.06b     vástrāṇi aruṣó háriḥ
9.008.06c     pári gávyāni avyata

9.008.07a     maghóna ā^́ pavasva no
9.008.07b     jahí víśvā ápa dvíṣaḥ
9.008.07c     índo sákhāyam ā^́ viśa

9.008.08a     vr̥ṣṭíṃ diváḥ pári srava
9.008.08b     dyumnám pr̥thiviyā^́ ádhi
9.008.08c     sáho naḥ soma pr̥tsú dhāḥ

9.008.09a     nr̥cákṣasaṃ tuvā vayám
9.008.09b     índrapītaṃ suvarvídam
9.008.09c     bhakṣīmáhi prajā^́m íṣam


9.009.01a     pári priyā^́ diváḥ kavír
9.009.01b     váyāṃsi naptíyor hitáḥ
9.009.01c     svānó° yāti kavíkratuḥ

9.009.02a     prá-pra kṣáyāya pányase
9.009.02b     jánāya júṣṭo adrúhe
9.009.02c     vītī^́ arṣa cániṣṭhayā

9.009.03a     sá sūnúr mātárā śúcir
9.009.03b     jātó jāté arocayat
9.009.03c     mahā^́n mahī^́ r̥tāvŕ̥dhā

9.009.04a     sá saptá dhītíbhir hitó
9.009.04b     nadyò ajinvad adrúhaḥ
9.009.04c     yā^́ ékam ákṣi vāvr̥dhúḥ

9.009.05a     tā^́ abhí sántam ástr̥tam
9.009.05b     mahé yúvānam ā^́ dadhuḥ
9.009.05c     índum indra táva vraté

9.009.06a     abhí váhnir ámartiyaḥ
9.009.06b     saptá paśyati vā^́vahiḥ
9.009.06c     krívir devī^́r atarpayat

9.009.07a     ávā kálpeṣu naḥ pumas
9.009.07b     támāṃsi soma yódhiyā
9.009.07c     tā^́ni punāna jaṅghanaḥ

9.009.08a     nū^́ návyase návīyase
9.009.08b     sūktā^́ya sādhayā patháḥ
9.009.08c     pratnavád rocayā rúcaḥ

9.009.09a     pávamāna máhi śrávo
9.009.09b     gā^́m áśvaṃ rāsi vīrávat
9.009.09c     sánā medhā^́ṃ sánā súvaḥ


9.010.01a     prá svānā^́so ráthā iva
9.010.01b     árvanto ná śravasyávaḥ
9.010.01c     sómāso rāyé akramuḥ

9.010.02a     hinvānā^́so ráthā iva
9.010.02b     dadhanviré gábhastiyoḥ
9.010.02c     bhárāsaḥ kāríṇām iva

9.010.03a     rā^́jāno ná práśastibhiḥ
9.010.03b     sómāso góbhir añjate
9.010.03c     yajñó ná saptá dhātŕ̥bhiḥ

9.010.04a     pári svānā^́sa° índavo
9.010.04b     mádāya barháṇā girā^́
9.010.04c     sutā^́ arṣanti dhā^́rayā

9.010.05a     āpānā^́so vivásvato
9.010.05b     jánanta uṣáso bhágam
9.010.05c     sū^́rā áṇvaṃ ví tanvate

9.010.06a     ápa dvā^́rā matīnã^́m
9.010.06b     pratnā^́ r̥ṇvanti kārávaḥ
9.010.06c     vŕ̥ṣṇo hárasa āyávaḥ

9.010.07a     samīcīnā^́sa āsate
9.010.07b     hótāraḥ saptájāmayaḥ
9.010.07c     padám ékasya píprataḥ

9.010.08a     nā^́bhā nā^́bhiṃ na ā^́ dade
9.010.08b     cákṣuś cit sū^́riye sácā
9.010.08c     kavér ápatyam ā^́ duhe

9.010.09a     abhí priyā^́ divás padám
9.010.09b     adhvaryúbhir gúhā hitám
9.010.09c     sū^́raḥ paśyati cákṣasā


9.011.01a     úpāsmai gāyatā naraḥ
9.011.01b     pávamānāya índave
9.011.01c     abhí devā^́m̐ íyakṣate

9.011.02a     abhí te mádhunā páyo
9.011.02b     átharvāṇo aśiśrayuḥ
9.011.02c     deváṃ devā^́ya devayú

9.011.03a     sá naḥ pavasva śáṃ gáve
9.011.03b     śáṃ jánāya śám árvate
9.011.03c     śáṃ rājann óṣadhībhiyaḥ

9.011.04a     babhráve nú svátavase
9.011.04b     aruṇā^́ya divispŕ̥śe
9.011.04c     sómāya gāthám arcata

9.011.05a     hástacyutebhir ádribhiḥ
9.011.05b     sutáṃ sómam punītana
9.011.05c     mádhāv ā^́ dhāvatā mádhu

9.011.06a     námaséd úpa sīdata
9.011.06b     dadhnéd abhí śriṇītana°
9.011.06c     índum índre dadhātana

9.011.07a     amitrahā^́ vícarṣaṇiḥ
9.011.07b     pávasva soma śáṃ gáve
9.011.07c     devébhyo anukāmakŕ̥t

9.011.08a     índrāya soma pā^́tave
9.011.08b     mádāya pári ṣicyase
9.011.08c     manaścín mánasas pátiḥ

9.011.09a     pávamāna suvī^́riyaṃ
9.011.09b     rayíṃ soma rirīhi naḥ
9.011.09c     índav índreṇa no yujā^́


9.012.01a     sómā asr̥gram índavaḥ
9.012.01b     sutā^́ r̥tásya sā^́dane
9.012.01c     índrāya mádhumattamāḥ

9.012.02a     abhí víprā anūṣata
9.012.02b     gā^́vo vatsáṃ ná mātáraḥ
9.012.02c     índraṃ sómasya pītáye

9.012.03a     madacyút kṣeti sā^́dane
9.012.03b     síndhor ūrmā^́ vipaścít
9.012.03c     sómo gaurī^́ ádhi śritáḥ

9.012.04a     divó nā^́bhā vicakṣaṇó
9.012.04b     ávyo vā^́re mahīyate
9.012.04c     sómo yáḥ sukrátuḥ kavíḥ

9.012.05a     yáḥ sómaḥ kaláśeṣu ā^́m̐
9.012.05b     antáḥ pavítra ā^́hitaḥ
9.012.05c     tám índuḥ pári ṣasvaje

9.012.06a     prá vā^́cam índur iṣyati
9.012.06b     samudrásyā^́dhi viṣṭápi
9.012.06c     jínvan kóśam madhuścútam

9.012.07a     nítyastotro vánaspátir
9.012.07b     dhīnā^́m antáḥ sabardúghaḥ
9.012.07c     hinvānó mā^́nuṣā yugā^́

9.012.08a     abhí priyā^́ divás padā^́
9.012.08b     sómo hinvānó arṣati
9.012.08c     víprasya dhā^́rayā kavíḥ

9.012.09a     ā^́ pavamāna dhāraya
9.012.09b     rayíṃ sahásravarcasam
9.012.09c     asmé indo suābhúvam


9.013.01a     sómaḥ punānó arṣati
9.013.01b     sahásradhāro átyaviḥ
9.013.01c     vāyór índrasya niṣkr̥tám

9.013.02a     pávamānam avasyavo
9.013.02b     vípram abhí prá gāyata
9.013.02c     suṣvāṇáṃ devávītaye

9.013.03a     pávante vā^́jasātaye
9.013.03b     sómāḥ sahásrapājasaḥ
9.013.03c     gr̥ṇānā^́ devávītaye

9.013.04a     utá no vā^́jasātaye
9.013.04b     pávasva br̥hatī^́r íṣaḥ
9.013.04c     dyumád indo suvī^́riyam

9.013.05a     té naḥ sahasríṇaṃ rayím
9.013.05b     pávantām ā^́ suvī^́riyam
9.013.05c     svānā^́° devā^́sa índavaḥ

9.013.06a     átyā hyānā^́° ná hetŕ̥bhir
9.013.06b     ásr̥graṃ vā^́jasātaye
9.013.06c     ví vā^́ram ávyam āśávaḥ

9.013.07a     vāśrā^́ arṣanti índavo
9.013.07b     abhí vatsáṃ ná dhenávaḥ
9.013.07c     dadhanviré gábhastiyoḥ

9.013.08a     júṣṭa índrāya matsaráḥ
9.013.08b     pávamāna kánikradat
9.013.08c     víśvā ápa dvíṣo jahi

9.013.09a     apaghnánto árāvaṇaḥ
9.013.09b     pávamānāḥ suvardŕ̥śaḥ
9.013.09c     yónāv r̥tásya sīdata


9.014.01a     pári prā^́siṣyadat kavíḥ
9.014.01b     síndhor ūrmā^́v ádhi śritáḥ
9.014.01c     kārám bíbhrat puruspŕ̥ham

9.014.02a     girā^́ yádī sábandhavaḥ
9.014.02b     páñca vrā^́tā apasyávaḥ
9.014.02c     pariṣkr̥ṇvánti dharṇasím

9.014.03a     ā^́d asya śuṣmíṇo ráse
9.014.03b     víśve devā^́ amatsata
9.014.03c     yádī góbhir vasāyáte

9.014.04a     niriṇānó ví dhāvati
9.014.04b     jáhac cháryāṇi tā^́nuvā
9.014.04c     átrā sáṃ jighnate yujā^́

9.014.05a     naptī^́bhir yó vivásvataḥ
9.014.05b     śubhró ná māmr̥jé yúvā
9.014.05c     gā^́ḥ kr̥ṇvānó ná nirṇíjam

9.014.06a     áti śritī^́ tiraścátā
9.014.06b     gavyā^́ jigāti áṇviyā
9.014.06c     vagnúm iyarti yáṃ vidé

9.014.07a     abhí kṣípaḥ sám agmata
9.014.07b     marjáyantīr iṣás pátim
9.014.07c     pr̥ṣṭhā^́ gr̥bhṇata vājínaḥ

9.014.08a     pári divyā^́ni mármr̥śad
9.014.08b     víśvāni soma pā^́rthivā
9.014.08c     vásūni yāhi asmayúḥ


9.015.01a     eṣá dhiyā^́ yāty áṇviyā
9.015.01b     śū^́ro ráthebhir āśúbhiḥ
9.015.01c     gáchann índrasya niṣkr̥tám

9.015.02a     eṣá purū^́ dhiyāyate
9.015.02b     br̥haté devátātaye
9.015.02c     yátrāmŕ̥tāsa ā^́sate

9.015.03a     eṣá hitó ví nīyate
9.015.03b     antáḥ śubhrā^́vatā pathā^́
9.015.03c     yádī tuñjánti bhū^́rṇayaḥ

9.015.04a     eṣá śŕ̥ṅgāṇi dódhuvac
9.015.04b     chíśīte yūthíyo vŕ̥ṣā
9.015.04c     nr̥mṇā^́ dádhāna ójasā

9.015.05a     eṣá rukmíbhir īyate
9.015.05b     vājī^́ śubhrébhir aṃśúbhiḥ
9.015.05c     pátiḥ síndhūnãm bhávan

9.015.06a     eṣá vásūni pibdanā^́
9.015.06b     páruṣā yayivā^́m̐ áti
9.015.06c     áva śā^́deṣu gachati

9.015.07a     etám mr̥janti márjiyam
9.015.07b     úpa dróṇeṣu āyávaḥ
9.015.07c     pracakrāṇám mahī^́r íṣaḥ

9.015.08a     etám u tyáṃ dáśa kṣípo
9.015.08b     mr̥jánti saptá dhītáyaḥ
9.015.08c     suāyudhám madíntamam


9.016.01a     prá te sotā^́ra oṇíyo
9.016.01b     rásam mádāya ghŕ̥ṣvaye
9.016.01c     sárgo ná takti étaśaḥ

9.016.02a     krátvā dákṣasya rathíyam
9.016.02b     apó vásānam ándhasā
9.016.02c     goṣā^́m áṇveṣu saścima

9.016.03a     ánaptam apsú duṣṭáraṃ
9.016.03b     sómam pavítra ā^́ sr̥ja
9.016.03c     punīhī^́ndrāya pā^́tave

9.016.04a     prá punānásya cétasā
9.016.04b     sómaḥ pavítre arṣati
9.016.04c     krátvā sadhástham ā^́sadat

9.016.05a     prá tvā námobhir índava
9.016.05b     índra sómā asr̥kṣata
9.016.05c     mahé bhárāya kāríṇaḥ

9.016.06a     punānó rūpé avyáye
9.016.06b     víśvā árṣann abhí śríyaḥ
9.016.06c     śū^́ro ná góṣu tiṣṭhati

9.016.07a     divó ná sā^́nu pipyúṣī
9.016.07b     dhā^́rā sutásya vedhásaḥ
9.016.07c     vŕ̥thā pavítre arṣati

9.016.08a     tuváṃ soma vipaścítaṃ
9.016.08b     tánā punāná āyúṣu
9.016.08c     ávyo vā^́raṃ ví dhāvasi


9.017.01a     prá nimnéneva síndhavo
9.017.01b     ghnánto vr̥trā^́ṇi bhū^́rṇayaḥ
9.017.01c     sómā asr̥gram āśávaḥ

9.017.02a     abhí svānā^́sa° índavo
9.017.02b     vr̥ṣṭáyaḥ pr̥thivī^́m iva
9.017.02c     índraṃ sómāso akṣaran

9.017.03a     átyūrmir matsaró mádaḥ
9.017.03b     sómaḥ pavítre arṣati
9.017.03c     vighnán rákṣāṃsi devayúḥ

9.017.04a     ā^́ kaláśeṣu dhāvati
9.017.04b     pavítre pári ṣicyate
9.017.04c     ukthaír yajñéṣu vardhate

9.017.05a     áti trī^́ soma rocanā^́
9.017.05b     róhan ná bhrājase dívam
9.017.05c     iṣṇán sū^́ryaṃ ná codayaḥ

9.017.06a     abhí víprā anūṣata
9.017.06b     mūrdhán yajñásya kārávaḥ
9.017.06c     dádhānāś cákṣasi priyám

9.017.07a     tám u tvā vājínaṃ náro
9.017.07b     dhībhír víprā avasyávaḥ
9.017.07c     mr̥jánti devátātaye

9.017.08a     mádhor dhā^́rām ánu kṣara
9.017.08b     tīvráḥ sadhástham ā^́sadaḥ
9.017.08c     cā^́rur r̥tā^́ya pītáye


9.018.01a     pári svānó° giriṣṭhã^́ḥ
9.018.01b     pavítre sómo akṣãḥ
9.018.01c     mádeṣu sarvadhā^́ asi

9.018.02a     tuváṃ vípras tuváṃ kavír
9.018.02b     mádhu prá jātám ándhasaḥ
9.018.02c     mádeṣu sarvadhā^́ asi

9.018.03a     táva víśve sajóṣaso
9.018.03b     devā^́saḥ pītím āśata
9.018.03c     mádeṣu sarvadhā^́ asi

9.018.04a     ā^́ yó víśvāni vā^́riyā
9.018.04b     vásūni hástayor dadhé
9.018.04c     mádeṣu sarvadhā^́ asi

9.018.05a     yá imé ródasī mahī^́
9.018.05b     sám mātáreva dóhate
9.018.05c     mádeṣu sarvadhā^́ asi

9.018.06a     pári yó ródasī ubhé
9.018.06b     sadyó vā^́jebhir árṣati
9.018.06c     mádeṣu sarvadhā^́ asi

9.018.07a     sá śuṣmī^́ kaláśeṣu ā^́
9.018.07b     punānó acikradat
9.018.07c     mádeṣu sarvadhā^́ asi


9.019.01a     yát soma citrám ukthíyaṃ
9.019.01b     diviyám pā^́rthivaṃ vásu
9.019.01c     tán naḥ punāná ā^́ bhara

9.019.02a     yuváṃ hí stháḥ súvarpatī
9.019.02b     índraś ca soma gópatī
9.019.02c     īśānā^́ pipyataṃ dhíyaḥ

9.019.03a     vŕ̥ṣā punāná āyúṣu
9.019.03b     stanáyann ádhi barhíṣi
9.019.03c     háriḥ sán yónim ā^́sadat

9.019.04a     ávāvaśanta dhītáyo
9.019.04b     vr̥ṣabhásyā^́dhi rétasi
9.019.04c     sūnór vatsásya mātáraḥ

9.019.05a     kuvíd vr̥ṣaṇyántībhiyaḥ
9.019.05b     punānó gárbham ādádhat
9.019.05c     yā^́ḥ śukráṃ duhaté páyaḥ

9.019.06a     úpa śikṣāpatasthúṣo
9.019.06b     bhiyásam ā^́ dhehi śátruṣu
9.019.06c     pávamāna vidā^́ rayím

9.019.07a     ní śátroḥ soma vŕ̥ṣṇiyaṃ
9.019.07b     ní śúṣmaṃ ní váyas tira
9.019.07c     dūré vā sató ánti vā


9.020.01a     prá kavír devávītaye
9.020.01b     ávyo vā^́rebhir arṣati
9.020.01c     sāhvā^́n víśvā abhí spŕ̥dhaḥ

9.020.02a     sá hí ṣmā jaritŕ̥bhya ā^́
9.020.02b     vā^́jaṃ gómantam ínvati
9.020.02c     pávamānaḥ sahasríṇam

9.020.03a     pári víśvāni cétasā
9.020.03b     mr̥śáse pávase matī^́
9.020.03c     sá naḥ soma śrávo vidaḥ

9.020.04a     abhí arṣa br̥hád yáśo
9.020.04b     maghávadbhyo dhruváṃ rayím
9.020.04c     íṣaṃ stotŕ̥bhya ā^́ bhara

9.020.05a     tuváṃ rā^́jeva suvrató
9.020.05b     gíraḥ somā^́ viveśitha
9.020.05c     punānó vahne adbhuta

9.020.06a     sá váhnir apsú duṣṭáro
9.020.06b     mr̥jyámāno gábhastiyoḥ
9.020.06c     sómaś camū^́ṣu sīdati

9.020.07a     krīḷúr makhó ná maṃhayúḥ
9.020.07b     pavítraṃ soma gachasi
9.020.07c     dádhat stotré suvī^́riyam


9.021.01a     eté dhāvanti índavaḥ
9.021.01b     sómā índrāya ghŕ̥ṣvayaḥ
9.021.01c     matsarā^́saḥ suvarvídaḥ

9.021.02a     pravr̥ṇvánto abhiyújaḥ
9.021.02b     súṣvaye varivovídaḥ
9.021.02c     svayáṃ stotré vayaskŕ̥taḥ

9.021.03a     vŕ̥thā krī^́ḷanta índavaḥ
9.021.03b     sadhástham abhí ékam ít
9.021.03c     síndhor ūrmā^́ ví akṣaran

9.021.04a     eté víśvāni vā^́riyā
9.021.04b     pávamānāsa āśata
9.021.04c     hitā^́ ná sáptayo ráthe

9.021.05a     ā^́smin piśáṅgam indavo
9.021.05b     dádhātā venám ādíśe
9.021.05c     yó asmábhyam árāvā

9.021.06a     r̥bhúr ná ráthiyaṃ návaṃ
9.021.06b     dádhātā kétam ādíśe
9.021.06c     śukrā^́ḥ pavadhvam árṇasā

9.021.07a     etá u tyé avīvaśan
9.021.07b     kā^́ṣṭhāṃ vājíno akrata
9.021.07c     satáḥ prā^́sāviṣur matím


9.022.01a     eté sómāsa āśávo
9.022.01b     ráthā iva prá vājínaḥ
9.022.01c     sárgāḥ sr̥ṣṭā^́ aheṣata

9.022.02a     eté vā^́tā ivorávaḥ
9.022.02b     parjányasyeva vr̥ṣṭáyaḥ
9.022.02c     agnér iva bhramā^́ vŕ̥thā

9.022.03a     eté pūtā^́ vipaścítaḥ
9.022.03b     sómāso dádhiāśiraḥ
9.022.03c     vipā^́ ví ānaśur dhíyaḥ

9.022.04a     eté mr̥ṣṭā^́ ámartiyāḥ
9.022.04b     sasr̥vā^́ṃso ná śaśramuḥ
9.022.04c     íyakṣantaḥ pathó rájaḥ

9.022.05a     eté pr̥ṣṭhā^́ni ródasor
9.022.05b     viprayánto ví ānaśuḥ
9.022.05c     utédám uttamáṃ rájaḥ

9.022.06a     tántuṃ tanvānám uttamám
9.022.06b     ánu praváta āśata
9.022.06c     utédám uttamā^́yiyam

9.022.07a     tuváṃ soma paṇíbhya ā^́
9.022.07b     vásu gávyāni dhārayaḥ
9.022.07c     tatáṃ tántum acikradaḥ


9.023.01a     sómā asr̥gram āśávo
9.023.01b     mádhor mádasya dhā^́rayā
9.023.01c     abhí víśvāni kā^́viyā

9.023.02a     ánu pratnā^́sa āyávaḥ
9.023.02b     padáṃ návīyo akramuḥ
9.023.02c     rucé jananta sū^́riyam

9.023.03a     ā^́ pavamāna no bhara
9.023.03b     aryó ádāśuṣo gáyam
9.023.03c     kr̥dhí prajā^́vatīr íṣaḥ

9.023.04a     abhí sómāsa āyávaḥ
9.023.04b     pávante mádiyam mádam
9.023.04c     abhí kóśam madhuścútam

9.023.05a     sómo arṣati dharṇasír
9.023.05b     dádhāna indriyáṃ rásam
9.023.05c     suvī^́ro abhiśastipā^́ḥ

9.023.06a     índrāya soma pavase
9.023.06b     devébhyaḥ sadhamā^́diyaḥ
9.023.06c     índo vā^́jaṃ siṣāsasi

9.023.07a     asyá pītvā^́ mádānãm
9.023.07b     índro vr̥trā^́ṇi apratí
9.023.07c     jaghā^́na jaghánac ca nú


9.024.01a     prá sómāso adhanviṣuḥ
9.024.01b     pávamānāsa índavaḥ
9.024.01c     śrīṇānā^́ apsú mr̥ñjata

9.024.02a     abhí gā^́vo adhanviṣur
9.024.02b     ā^́po ná pravátā yatī^́ḥ
9.024.02c     punānā^́ índram āśata

9.024.03a     prá pavamāna dhanvasi
9.024.03b     sóma índrāya pā^́tave
9.024.03c     nŕ̥bhir yató ví nīyase

9.024.04a     tuváṃ soma nr̥mā^́danaḥ
9.024.04b     pávasva carṣaṇīsáhe
9.024.04c     sásnir yó anumā^́diyaḥ

9.024.05a     índo yád ádribhiḥ sutáḥ
9.024.05b     pavítram paridhā^́vasi
9.024.05c     áram índrasya dhā^́mane

9.024.06a     pávasva vr̥trahantama
9.024.06b     ukthébhir anumā^́diyaḥ
9.024.06c     śúciḥ pavākó⁺ ádbhutaḥ

9.024.07a     śúciḥ pavāká⁺ ucyate
9.024.07b     sómaḥ sutásya mádhuvaḥ
9.024.07c     devāvī^́r aghaśaṃsahā^́


9.025.01a     pávasva dakṣasā^́dhano
9.025.01b     devébhyaḥ pītáye hare
9.025.01c     marúdbhyo vāyáve mádaḥ

9.025.02a     pávamāna dhiyā^́ hitó
9.025.02b     abhí yóniṃ kánikradat
9.025.02c     dhármaṇā vāyúm ā^́ viśa

9.025.03a     sáṃ devaíḥ śobhate vŕ̥ṣā
9.025.03b     kavír yónāv ádhi priyáḥ
9.025.03c     vr̥trahā^́ devavī^́tamaḥ

9.025.04a     víśvā rūpā^́ṇi āviśán
9.025.04b     punānó yāti haryatáḥ
9.025.04c     yátrāmŕ̥tāsa ā^́sate

9.025.05a     aruṣó janáyan gíraḥ
9.025.05b     sómaḥ pavata āyuṣák
9.025.05c     índraṃ gáchan kavíkratuḥ

9.025.06a     ā^́ pavasva madintama
9.025.06b     pavítraṃ dhā^́rayā kave
9.025.06c     arkásya yónim āsádam


9.026.01a     tám amr̥kṣanta vājínam
9.026.01b     upásthe áditer ádhi
9.026.01c     víprāso áṇviyā dhiyā^́

9.026.02a     táṃ gā^́vo abhy ànūṣata
9.026.02b     sahásradhāram ákṣitam
9.026.02c     índuṃ dhartā^́ram ā^́ diváḥ

9.026.03a     táṃ vedhā^́m medháyāhiyan
9.026.03b     pávamānam ádhi dyávi
9.026.03c     dharṇasím bhū^́ridhāyasam

9.026.04a     tám ahyan bhuríjor dhiyā^́
9.026.04b     saṃvásānaṃ vivásvataḥ
9.026.04c     pátiṃ vācó ádābhiyam

9.026.05a     táṃ sā^́nāv ádhi jāmáyo
9.026.05b     háriṃ hinvanti ádribhiḥ
9.026.05c     haryatám bhū^́ricakṣasam

9.026.06a     táṃ tvā hinvanti vedhásaḥ
9.026.06b     pávamāna girāvŕ̥dham
9.026.06c     índav índrāya matsarám


9.027.01a     eṣá kavír abhíṣṭutaḥ
9.027.01b     pavítre ádhi tośate
9.027.01c     punānó ghnánn ápa srídhaḥ

9.027.02a     eṣá índrāya vāyáve
9.027.02b     suvarjít pári ṣicyate
9.027.02c     pavítre dakṣasā^́dhanaḥ

9.027.03a     eṣá nŕ̥bhir ví nīyate
9.027.03b     divó mūrdhā^́ vŕ̥ṣā sutáḥ
9.027.03c     sómo váneṣu viśvavít

9.027.04a     eṣá gavyúr acikradat
9.027.04b     pávamāno hiraṇyayúḥ
9.027.04c     índuḥ satrājíd ástr̥taḥ

9.027.05a     eṣá sū^́ryeṇa hāsate
9.027.05b     pávamāno ádhi dyávi
9.027.05c     pavítre matsaró mádaḥ

9.027.06a     eṣá śuṣmī^́ asiṣyadad
9.027.06b     antárikṣe vŕ̥ṣā háriḥ
9.027.06c     punāná índur índram ā^́


9.028.01a     eṣá vājī^́ hitó nŕ̥bhir
9.028.01b     viśvavín mánasas pátiḥ
9.028.01c     ávyo vā^́raṃ ví dhāvati

9.028.02a     eṣá pavítre akṣarat
9.028.02b     sómo devébhiyaḥ sutáḥ
9.028.02c     víśvā dhā^́māni āviśán

9.028.03a     eṣá deváḥ śubhāyate
9.028.03b     ádhi yónāv ámartiyaḥ
9.028.03c     vr̥trahā^́ devavī^́tamaḥ

9.028.04a     eṣá vŕ̥ṣā kánikradad
9.028.04b     daśábhir jāmíbhir yatáḥ
9.028.04c     abhí dróṇāni dhāvati

9.028.05a     eṣá sū^́ryam arocayat
9.028.05b     pávamāno vícarṣaṇiḥ
9.028.05c     víśvā dhā^́māni viśvavít

9.028.06a     eṣá śuṣmī^́ ádābhiyaḥ
9.028.06b     sómaḥ punānó arṣati
9.028.06c     devāvī^́r aghaśaṃsahā^́


9.029.01a     prá asya dhā^́rā akṣaran
9.029.01b     vŕ̥ṣṇaḥ sutásya ójasā
9.029.01c     devā^́m̐ ánu prabhū^́ṣataḥ

9.029.02a     sáptim mr̥janti vedháso
9.029.02b     gr̥ṇántaḥ kārávo girā^́
9.029.02c     jyótir jajñānám ukthíyam

9.029.03a     suṣáhā soma tā^́ni te
9.029.03b     punānā^́ya prabhūvaso
9.029.03c     várdhā samudrám ukthíyam

9.029.04a     víśvā vásūni saṃjáyan
9.029.04b     pávasva soma dhā^́rayā
9.029.04c     inú dvéṣāṃsi sadhríak

9.029.05a     rákṣā sú no áraruṣaḥ
9.029.05b     svanā^́t samasya kásya cit
9.029.05c     nidó yátra mumucmáhe

9.029.06a     ā^́ indo pā^́rthivaṃ rayíṃ
9.029.06b     divyám pavasva dhā^́rayā
9.029.06c     dyumántaṃ śúṣmam ā^́ bhara


9.030.01a     prá dhā^́rā asya śuṣmíṇo
9.030.01b     vŕ̥thā pavítre akṣaran
9.030.01c     punānó vā^́cam iṣyati

9.030.02a     índur hiyānáḥ sotŕ̥bhir
9.030.02b     mr̥jyámānaḥ kánikradat
9.030.02c     íyarti vagnúm indriyám

9.030.03a     ā^́ naḥ śúṣmaṃ nr̥ṣā^́hiyaṃ
9.030.03b     vīrávantam puruspŕ̥ham
9.030.03c     pávasva soma dhā^́rayā

9.030.04a     prá sómo áti dhā^́rayā
9.030.04b     pávamāno asiṣyadat
9.030.04c     abhí dróṇāni āsádam

9.030.05a     apsú tvā mádhumattamaṃ
9.030.05b     háriṃ hinvanti ádribhiḥ
9.030.05c     índav índrāya pītáye

9.030.06a     sunótā mádhumattamaṃ
9.030.06b     sómam índrāya vajríṇe
9.030.06c     cā^́ruṃ śárdhāya matsarám


9.031.01a     prá sómāsaḥ suādhíyaḥ
9.031.01b     pávamānāso akramuḥ
9.031.01c     rayíṃ kr̥ṇvanti cétanam

9.031.02a     divás pr̥thiviyā^́ ádhi
9.031.02b     bhávendo dyumnavárdhanaḥ
9.031.02c     bhávā vā^́jānãm pátiḥ

9.031.03a     túbhyaṃ vā^́tā abhipríyas
9.031.03b     túbhyam arṣanti síndhavaḥ
9.031.03c     sóma várdhanti te máhaḥ

9.031.04a     ā^́ pyāyasva sám etu te
9.031.04b     viśvátaḥ soma vŕ̥ṣṇiyam
9.031.04c     bhávā vā^́jasya saṃgathé

9.031.05a     túbhyaṃ gā^́vo ghr̥tám páyo
9.031.05b     bábhro duduhré ákṣitam
9.031.05c     várṣiṣṭhe ádhi sā^́navi

9.031.06a     suāyudhásya te sató
9.031.06b     bhúvanasya pate vayám
9.031.06c     índo sakhitvám uśmasi


9.032.01a     prá sómāso madacyútaḥ
9.032.01b     śrávase no maghõ^́naḥ
9.032.01c     sutā^́ vidáthe akramuḥ

9.032.02a     ā^́d īṃ tritásya yóṣaṇo
9.032.02b     háriṃ hinvanti ádribhiḥ
9.032.02c     índum índrāya pītáye

9.032.03a     ā^́d īṃ haṃsó yáthā gaṇáṃ
9.032.03b     víśvasyāvīvaśan matím
9.032.03c     átyo ná góbhir ajyate

9.032.04a     ubhé somāvacā^́kaśan
9.032.04b     mr̥gó ná taktó arṣasi
9.032.04c     sī^́dann r̥tásya yónim ā^́

9.032.05a     abhí gā^́vo anūṣata
9.032.05b     yóṣā jārám iva priyám
9.032.05c     ágann ājíṃ yáthā hitám

9.032.06a     asmé dhehi dyumád yáśo
9.032.06b     maghávadbhyaś ca máhya° ca
9.032.06c     saním medhā^́m utá śrávaḥ


9.033.01a     prá sómāso vipaścíto
9.033.01b     apā^́ṃ ná yanti ūrmáyaḥ
9.033.01c     vánāni mahiṣā^́ iva

9.033.02a     abhí dróṇāni babhrávaḥ
9.033.02b     śukrā^́ r̥tásya dhā^́rayā
9.033.02c     vā^́jaṃ gómantam akṣaran

9.033.03a     sutā^́ índrāya vāyáve
9.033.03b     váruṇāya marúdbhiyaḥ
9.033.03c     sómā arṣanti víṣṇave

9.033.04a     tisró vā^́ca úd īrate
9.033.04b     gā^́vo mimanti dhenávaḥ
9.033.04c     hárir eti kánikradat

9.033.05a     abhí bráhmīr anūṣata
9.033.05b     yahvī^́r r̥tásya mātáraḥ
9.033.05c     marmr̥jyánte diváḥ śíśum

9.033.06a     rāyáḥ samudrā^́ṃś catúro
9.033.06b     asmábhyaṃ soma viśvátaḥ
9.033.06c     ā^́ pavasva sahasríṇaḥ


9.034.01a     prá svānó° dhā^́rayā tánā
9.034.01b     índur hinvānó arṣati
9.034.01c     rujád dr̥̄ḷhā^́+ ví ójasā

9.034.02a     sutá índrāya vāyáve
9.034.02b     váruṇāya marúdbhiyaḥ
9.034.02c     sómo arṣati víṣṇave

9.034.03a     vŕ̥ṣāṇaṃ vŕ̥ṣabhir yatáṃ
9.034.03b     sunvánti sómam ádribhiḥ
9.034.03c     duhánti śákmanā páyaḥ

9.034.04a     bhúvat tritásya márjiyo
9.034.04b     bhúvad índrāya matsaráḥ
9.034.04c     sáṃ rūpaír ajyate háriḥ

9.034.05a     abhī^́m r̥tásya viṣṭápaṃ
9.034.05b     duhaté pŕ̥śnimātaraḥ
9.034.05c     cā^́ru priyátamaṃ havíḥ

9.034.06a     sám enam áhrutā imā^́
9.034.06b     gíro arṣanti sasrútaḥ
9.034.06c     dhenū^́r vāśró avīvaśat


9.035.01a     ā^́ naḥ pavasva dhā^́rayā
9.035.01b     pávamāna rayím pr̥thúm
9.035.01c     yáyā jyótir vidā^́si naḥ

9.035.02a     índo samudramīṅkhaya
9.035.02b     pávasva viśvamejaya
9.035.02c     rāyó dhartā^́ na ójasā

9.035.03a     tváyā vīréṇa vīravo
9.035.03b     abhí ṣyāma pr̥tanyatáḥ
9.035.03c     kṣárā ṇo abhí vā^́riyam

9.035.04a     prá vā^́jam índur iṣyati
9.035.04b     síṣāsan vājasā^́ ŕ̥ṣiḥ
9.035.04c     vratā^́ vidāná ā^́yudhā

9.035.05a     táṃ gīrbhír vācamīṅkhayám
9.035.05b     punānáṃ vāsayāmasi
9.035.05c     sómaṃ jánasya gópatim

9.035.06a     víśvo yásya vraté jáno
9.035.06b     dādhā^́ra dhármaṇas páteḥ
9.035.06c     punānásya prabhū^́vasoḥ


9.036.01a     ásarji ráthiyo yathā
9.036.01b     pavítre camúvoḥ sutáḥ
9.036.01c     kā^́rṣman vājī^́ ní akramīt

9.036.02a     sá váhniḥ soma jā^́gr̥viḥ
9.036.02b     pávasva devavī^́r áti
9.036.02c     abhí kóśam madhuścútam

9.036.03a     sá no jyótīṃṣi pūrviya
9.036.03b     pávamāna ví rocaya
9.036.03c     krátve dákṣāya no hinu

9.036.04a     śumbhámāna r̥tāyúbhir
9.036.04b     mr̥jyámāno gábhastiyoḥ
9.036.04c     pávate vā^́re avyáye

9.036.05a     sá víśvā dāśúṣe vásu
9.036.05b     sómo divyā^́ni pā^́rthivā
9.036.05c     pávatām ā^́ntárikṣiyā

9.036.06a     ā^́ divás pr̥ṣṭhám aśvayúr
9.036.06b     gavyayúḥ soma rohasi
9.036.06c     vīrayúḥ śavasas pate


9.037.01a     sá sutáḥ pītáye vŕ̥ṣā
9.037.01b     sómaḥ pavítre arṣati
9.037.01c     vighnán rákṣāṃsi devayúḥ

9.037.02a     sá pavítre vicakṣaṇó
9.037.02b     hárir arṣati dharṇasíḥ
9.037.02c     abhí yóniṃ kánikradat

9.037.03a     sá vājī^́ rocanā^́ diváḥ
9.037.03b     pávamāno ví dhāvati
9.037.03c     rakṣohā^́ vā^́ram avyáyam

9.037.04a     sá tritásyā^́dhi sā^́navi
9.037.04b     pávamāno arocayat
9.037.04c     jāmíbhiḥ sū^́riyaṃ sahá

9.037.05a     sá vr̥trahā^́ vŕ̥ṣā sutó
9.037.05b     varivovíd ádābhiyaḥ
9.037.05c     sómo vā^́jam ivāsarat

9.037.06a     sá deváḥ kavíneṣitó
9.037.06b     abhí dróṇāni dhāvati
9.037.06c     índur índrāya maṃhánā


9.038.01a     eṣá u syá vŕ̥ṣā rátho
9.038.01b     ávyo vā^́rebhir arṣati
9.038.01c     gáchan vā^́jaṃ sahasríṇam

9.038.02a     etáṃ tritásya yóṣaṇo
9.038.02b     háriṃ hinvanti ádribhiḥ
9.038.02c     índum índrāya pītáye

9.038.03a     etáṃ tyáṃ haríto dáśa
9.038.03b     marmr̥jyánte apasyúvaḥ
9.038.03c     yā^́bhir mádāya śúmbhate

9.038.04a     eṣá syá mā^́nuṣīṣu ā^́
9.038.04b     śyenó ná vikṣú sīdati
9.038.04c     gáchañ jāró ná yoṣítam

9.038.05a     eṣá syá mádiyo ráso
9.038.05b     áva caṣṭe diváḥ śíśuḥ
9.038.05c     yá índur vā^́ram ā^́viśat

9.038.06a     eṣá syá pītáye sutó
9.038.06b     hárir arṣati dharṇasíḥ
9.038.06c     krándan yónim abhí priyám


9.039.01a     āśúr arṣa br̥hanmate
9.039.01b     pári priyéṇa dhā^́manā
9.039.01c     yátra devā^́ íti brávan

9.039.02a     pariṣkr̥ṇvánn ániṣkr̥taṃ
9.039.02b     jánāya yātáyann íṣaḥ
9.039.02c     vr̥ṣṭíṃ diváḥ pári srava

9.039.03a     sutá eti pavítra ā^́
9.039.03b     tvíṣiṃ dádhāna ójasā
9.039.03c     vicákṣāṇo virocáyan

9.039.04a     ayáṃ sá yó divás pári
9.039.04b     raghuyā^́mā pavítra ā^́
9.039.04c     síndhor ūrmā^́ ví ákṣarat

9.039.05a     āvívāsan parāváto
9.039.05b     átho arvāvátaḥ sutáḥ
9.039.05c     índrāya sicyate mádhu

9.039.06a     samīcīnā^́ anūṣata
9.039.06b     háriṃ hinvanti ádribhiḥ
9.039.06c     yónāv r̥tásya sīdata


9.040.01a     punānó akramīd abhí
9.040.01b     víśvā mŕ̥dho vícarṣaṇiḥ
9.040.01c     śumbhánti vípraṃ dhītíbhiḥ

9.040.02a     ā^́ yónim aruṇó ruhad
9.040.02b     gámad índraṃ vŕ̥ṣā sutáḥ
9.040.02c     dhruvé sádasi sīdati

9.040.03a     nū^́ no rayím mahā^́m indo
9.040.03b     asmábhyaṃ soma viśvátaḥ
9.040.03c     ā^́ pavasva sahasríṇam

9.040.04a     víśvā soma pavamāna
9.040.04b     dyumnā^́ni indav ā^́ bhara
9.040.04c     vidā^́ḥ sahasríṇīr íṣaḥ

9.040.05a     sá naḥ punāná ā^́ bhara
9.040.05b     rayíṃ stotré suvī^́riyam
9.040.05c     jaritúr vardhayā gíraḥ

9.040.06a     punāná indav ā^́ bhara
9.040.06b     sóma dvibárhasaṃ rayím
9.040.06c     vŕ̥ṣann indo na ukthíyam


9.041.01a     prá yé gā^́vo ná bhū^́rṇayas
9.041.01b     tveṣā^́ ayā^́so ákramuḥ
9.041.01c     ghnántaḥ kr̥ṣṇā^́m ápa tvácam

9.041.02a     suvitásya manāmahe
9.041.02b     áti sétuṃ durāvíyam
9.041.02c     sāhvā^́ṃso dásyum avratám

9.041.03a     śr̥ṇvé vr̥ṣṭér iva svanáḥ
9.041.03b     pávamānasya śuṣmíṇaḥ
9.041.03c     cáranti vidyúto diví

9.041.04a     ā^́ pavasva mahī^́m íṣaṃ
9.041.04b     gómad indo híraṇyavat
9.041.04c     áśvāvad vā^́javat sutáḥ

9.041.05a     sá pavasva vicarṣaṇa
9.041.05b     ā^́ mahī^́ ródasī pr̥ṇa
9.041.05c     uṣā^́ḥ sū^́ryo ná raśmíbhiḥ

9.041.06a     pári ṇaḥ śarmayántiyā
9.041.06b     dhā^́rayā soma viśvátaḥ
9.041.06c     sárā raséva viṣṭápam


9.042.01a     janáyan rocanā^́ divó
9.042.01b     janáyann apsú sū^́riyam
9.042.01c     vásāno gā^́ apó háriḥ

9.042.02a     eṣá pratnéna mánmanā
9.042.02b     devó devébhiyas pári
9.042.02c     dhā^́rayā pavate sutáḥ

9.042.03a     vāvr̥dhānā^́ya tū^́rvaye
9.042.03b     pávante vā^́jasātaye
9.042.03c     sómāḥ sahásrapājasaḥ

9.042.04a     duhānáḥ pratnám ít páyaḥ
9.042.04b     pavítre pári ṣicyate
9.042.04c     krándan devā^́m̐ ajījanat

9.042.05a     abhí víśvāni vā^́riyā
9.042.05b     abhí devā^́m̐ r̥tāvŕ̥dhaḥ
9.042.05c     sómaḥ punānó arṣati

9.042.06a     góman naḥ soma vīrávad
9.042.06b     áśvāvad vā^́javat sutáḥ
9.042.06c     pávasva br̥hatī^́r íṣaḥ


9.043.01a     yó átya iva mr̥jyáte
9.043.01b     góbhir mádāya haryatáḥ
9.043.01c     táṃ gīrbhír vāsayāmasi

9.043.02a     táṃ no víśvā avasyúvo
9.043.02b     gíraḥ śumbhanti pūrváthā
9.043.02c     índum índrāya pītáye

9.043.03a     punānó yāti haryatáḥ
9.043.03b     sómo gīrbhíḥ páriṣkr̥taḥ
9.043.03c     víprasya médhiyātitheḥ

9.043.04a     pávamāna vidā^́ rayím
9.043.04b     asmábhyaṃ soma suśríyam
9.043.04c     índo sahásravarcasam

9.043.05a     índur átyo ná vājasŕ̥t
9.043.05b     kánikranti pavítra ā^́
9.043.05c     yád ákṣār áti devayúḥ

9.043.06a     pávasva vā^́jasātaye
9.043.06b     víprasya gr̥ṇató vr̥dhé
9.043.06c     sóma rā^́sva suvī^́riyam


9.044.01a     prá ṇa indo mahé tána
9.044.01b     ūrmíṃ ná bíbhrad arṣasi
9.044.01c     abhí devā^́m̐ ayā^́siyaḥ

9.044.02a     matī^́ juṣṭó dhiyā^́ hitáḥ
9.044.02b     sómo hinve parāváti
9.044.02c     víprasya dhā^́rayā kavíḥ

9.044.03a     ayáṃ devéṣu jā^́gr̥viḥ
9.044.03b     sutá eti pavítra ā^́
9.044.03c     sómo yāti vícarṣaṇiḥ

9.044.04a     sá naḥ pavasva vājayúś
9.044.04b     cakrāṇáś cā^́rum adhvarám
9.044.04c     barhíṣmām̐ ā^́ vivāsati

9.044.05a     sá no bhágāya vāyáve
9.044.05b     vípravīraḥ sadā^́vr̥dhaḥ
9.044.05c     sómo devéṣu ā^́ yamat

9.044.06a     sá no adyá vásuttaye
9.044.06b     kratuvíd gātuvíttamaḥ
9.044.06c     vā^́jaṃ jeṣi śrávo br̥hát


9.045.01a     sá pavasva mádāya káṃ
9.045.01b     nr̥cákṣā devávītaye
9.045.01c     índav índrāya pītáye

9.045.02a     sá no arṣābhí dūtíyaṃ
9.045.02b     tuvám índrāya tośase
9.045.02c     devā^́n sákhibhya ā^́ váram

9.045.03a     utá tvā^́m aruṇáṃ vayáṃ
9.045.03b     góbhir añjmo mádāya kám
9.045.03c     ví no rāyé dúro vr̥dhi

9.045.04a     áty ū pavítram akramīd
9.045.04b     vājī^́ dhúraṃ ná yā^́mani
9.045.04c     índur devéṣu patyate

9.045.05a     sám ī sákhāyo asvaran
9.045.05b     váne krī^́ḷantam átyavim
9.045.05c     índuṃ nāvā^́ anūṣata

9.045.06a     táyā pavasva dhā^́rayā
9.045.06b     yáyā pītó vicákṣase
9.045.06c     índo stotré suvī^́riyam


9.046.01a     ásr̥gran devávītaye
9.046.01b     átyāsaḥ kŕ̥tviyā iva
9.046.01c     kṣárantaḥ parvatāvŕ̥dhaḥ

9.046.02a     páriṣkr̥tāsa índavo
9.046.02b     yóṣeva pítriyāvatī
9.046.02c     vāyúṃ sómā asr̥kṣata

9.046.03a     eté sómāsa índavaḥ
9.046.03b     práyasvantaḥ camū^́ sutā^́ḥ
9.046.03c     índraṃ vardhanti kármabhiḥ

9.046.04a     ā^́ dhāvatā suhastiyaḥ
9.046.04b     śukrā^́ gr̥bhṇīta manthínā
9.046.04c     góbhiḥ śrīṇīta matsarám

9.046.05a     sá pavasva dhanaṃjaya
9.046.05b     prayantā^́ rā^́dhaso maháḥ
9.046.05c     asmábhyaṃ soma gātuvít

9.046.06a     etám mr̥janti márjiyam
9.046.06b     pávamānaṃ dáśa kṣípaḥ
9.046.06c     índrāya matsarám mádam


9.047.01a     ayā^́ sómaḥ sukr̥tyáyā
9.047.01b     maháś cid abhy àvardhata
9.047.01c     mandāná úd vr̥ṣāyate

9.047.02a     kr̥tā^́nī^́d asya kártuvā
9.047.02b     cétante dasyutárhaṇā
9.047.02c     r̥ṇā^́ ca dhr̥ṣṇúś cayate

9.047.03a     ā^́t sóma indriyó ráso
9.047.03b     vájraḥ sahasrasā^́ bhuvat
9.047.03c     uktháṃ yád asya jā^́yate

9.047.04a     svayáṃ kavír vidhartári
9.047.04b     víprāya rátnam ichati
9.047.04c     yádī marmr̥jyáte dhíyaḥ

9.047.05a     siṣāsátū rayīṇã^́ṃ
9.047.05b     vā^́jeṣu árvatām iva
9.047.05c     bháreṣu jigyúṣām asi


9.048.01a     táṃ tvā nr̥mṇā^́ni bíbhrataṃ
9.048.01b     sadhástheṣu mahó diváḥ
9.048.01c     cā^́ruṃ sukr̥tyáyemahe

9.048.02a     sáṃvr̥ktadhr̥ṣṇum ukthíyam
9.048.02b     mahā^́mahivratam mádam
9.048.02c     śatám púro rurukṣáṇim

9.048.03a     átas tuvā rayím abhí
9.048.03b     rā^́jānaṃ sukrato diváḥ
9.048.03c     suparṇó avyathír bharat

9.048.04a     víśvasmā ít súvar dr̥śé
9.048.04b     sā^́dhāraṇaṃ rajastúram
9.048.04c     gopā^́m r̥tásya vír bharat

9.048.05a     ádhā hinvāná indriyáṃ
9.048.05b     jyā^́yo mahitvám ānaśe
9.048.05c     abhiṣṭikŕ̥d vícarṣaṇiḥ


9.049.01a     pávasva vr̥ṣṭím ā^́ sú no
9.049.01b     apā^́m ūrmíṃ divás pári
9.049.01c     ayakṣmā^́ br̥hatī^́r íṣaḥ

9.049.02a     táyā pavasva dhā^́rayā
9.049.02b     yáyā gā^́va ihā^́gáman
9.049.02c     jányāsa úpa no gr̥hám

9.049.03a     ghr̥tám pavasva dhā^́rayā
9.049.03b     yajñéṣu devavī^́tamaḥ
9.049.03c     asmábhyaṃ vr̥ṣṭím ā^́ pava

9.049.04a     sá na ūrjé ví avyáyam
9.049.04b     pavítraṃ dhāva dhā^́rayā
9.049.04c     devā^́saḥ śr̥ṇávan hí kam

9.049.05a     pávamāno asiṣyadad
9.049.05b     rákṣāṃsi apajáṅghanat
9.049.05c     pratnavád rocáyan rúcaḥ


9.050.01a     út te śúṣmāsa īrate
9.050.01b     síndhor ūrmér iva svanáḥ
9.050.01c     vāṇásya codayā pavím

9.050.02a     prasavé ta úd īrate
9.050.02b     tisró vā^́co makhasyúvaḥ
9.050.02c     yád ávya éṣi sā^́navi

9.050.03a     ávyo vā^́re pári priyáṃ
9.050.03b     háriṃ hinvanti ádribhiḥ
9.050.03c     pávamānam madhuścútam

9.050.04a     ā^́ pavasva madintama
9.050.04b     pavítraṃ dhā^́rayā kave
9.050.04c     arkásya yónim āsádam

9.050.05a     sá pavasva madintama
9.050.05b     góbhir añjānó aktúbhiḥ
9.050.05c     índav índrāya pītáye


9.051.01a     ádhvaryo ádribhiḥ sutáṃ
9.051.01b     sómam pavítra ā^́ sr̥ja
9.051.01c     punīhī^́ndrāya pā^́tave

9.051.02a     diváḥ pīyū^́ṣam uttamáṃ
9.051.02b     sómam índrāya vajríṇe
9.051.02c     sunótā mádhumattamam

9.051.03a     táva tyá indo ándhaso
9.051.03b     devā^́ mádhor ví aśnate
9.051.03c     pávamānasya marútaḥ

9.051.04a     tuváṃ hí soma vardháyan
9.051.04b     sutó mádāya bhū^́rṇaye
9.051.04c     vŕ̥ṣan stotā^́ram ūtáye

9.051.05a     abhí arṣa vicakṣaṇa
9.051.05b     pavítraṃ dhā^́rayā sutáḥ
9.051.05c     abhí vā^́jam utá śrávaḥ


9.052.01a     pári dyukṣáḥ sanádrayir
9.052.01b     bhárad vā^́jaṃ no ándhasā
9.052.01c     svānó° arṣa pavítra ā^́

9.052.02a     táva pratnébhir ádhvabhir
9.052.02b     ávyo vā^́re pári priyáḥ
9.052.02c     sahásradhāro yāt tánā

9.052.03a     carúr ná yás tám īṅkhaya
9.052.03b     índo ná dā^́nam īṅkhaya
9.052.03c     vadhaír vadhasnav īṅkhaya

9.052.04a     ní śúṣmam indav eṣãm
9.052.04b     púruhūta jánānãm
9.052.04c     yó asmā^́m̐ ādídeśati

9.052.05a     śatáṃ na inda ūtíbhiḥ
9.052.05b     sahásraṃ vā śúcīnãm
9.052.05c     pávasva maṃhayádrayiḥ


9.053.01a     út te śúṣmāso asthū
9.053.01b     rákṣo bhindánto adrivaḥ
9.053.01c     nudásva yā^́ḥ parispŕ̥dhaḥ

9.053.02a     ayā^́ nijaghnír ójasā
9.053.02b     rathasaṃgé dháne hité
9.053.02c     stávā ábibhyuṣā hr̥dā^́

9.053.03a     ásya vratā^́ni nā^́dhŕ̥ṣe
9.053.03b     pávamānasya dūḍhíyā
9.053.03c     rujá yás tvā pr̥tanyáti

9.053.04a     táṃ hinvanti madacyútaṃ
9.053.04b     háriṃ nadī^́ṣu vājínam
9.053.04c     índum índrāya matsarám


9.054.01a     asyá pratnā^́m ánu dyútaṃ
9.054.01b     śukráṃ duduhre áhrayaḥ
9.054.01c     páyaḥ sahasrasā^́m ŕ̥ṣim

9.054.02a     ayáṃ sū^́rya ivopadŕ̥g
9.054.02b     ayáṃ sárāṃsi dhāvati
9.054.02c     saptá praváta ā^́ dívam

9.054.03a     ayáṃ víśvāni tiṣṭhati
9.054.03b     punānó bhúvanopári
9.054.03c     sómo devó ná sū^́riyaḥ

9.054.04a     pári ṇo devávītaye
9.054.04b     vā^́jām̐ arṣasi gómataḥ
9.054.04c     punāná indav indrayúḥ


9.055.01a     yávaṃ-yavaṃ no ándhasā
9.055.01b     puṣṭám-puṣṭam pári srava
9.055.01c     sóma víśvā ca saúbhagā

9.055.02a     índo yáthā táva stávo
9.055.02b     yáthā te jātám ándhasaḥ
9.055.02c     ní barhíṣi priyé sadaḥ

9.055.03a     utá no govíd aśvavít
9.055.03b     pávasva soma ándhasā
9.055.03c     makṣū^́tamebhir áhabhiḥ

9.055.04a     yó jinā^́ti ná jī^́yate
9.055.04b     hánti śátrum abhī^́tiya
9.055.04c     sá pavasva sahasrajit


9.056.01a     pári sóma r̥tám br̥hád
9.056.01b     āśúḥ pavítre arṣati
9.056.01c     vighnán rákṣāṃsi devayúḥ

9.056.02a     yát sómo vā^́jam árṣati
9.056.02b     śatáṃ dhā^́rā apasyúvaḥ
9.056.02c     índrasya sakhyám āviśán

9.056.03a     abhí tvā yóṣaṇo dáśa
9.056.03b     jāráṃ ná kanyā^̀nūṣata
9.056.03c     mr̥jyáse soma sātáye

9.056.04a     tuvám índrāya víṣṇave
9.056.04b     svādúr indo pári srava
9.056.04c     nr̥̄^́n stotr̥̄^́n pāhi áṃhasaḥ


9.057.01a     prá te dhā^́rā asaścáto
9.057.01b     divó ná yanti vr̥ṣṭáyaḥ
9.057.01c     áchā vā^́jaṃ sahasríṇam

9.057.02a     abhí priyā^́ṇi kā^́viyā
9.057.02b     víśvā cákṣāṇo arṣati
9.057.02c     háris tuñjāná ā^́yudhā

9.057.03a     sá marmr̥jāná āyúbhir
9.057.03b     íbho rā^́jeva suvratáḥ
9.057.03c     śyenó ná váṃsu ṣīdati

9.057.04a     sá no víśvā divó vásu
9.057.04b     utó pr̥thiviyā^́ ádhi
9.057.04c     punāná indav ā^́ bhara


9.058.01a     tárat sá mandī^́ dhāvati
9.058.01b     dhā^́rā sutásya ándhasaḥ
9.058.01c     tárat sá mandī^́ dhāvati

9.058.02a     usrā^́ veda vásūnãm
9.058.02b     mártasya devī^́ ávasaḥ
9.058.02c     tárat sá mandī^́ dhāvati

9.058.03a     dhvasráyoḥ puruṣántiyor
9.058.03b     ā^́ sahásrāṇi dadmahe
9.058.03c     tárat sá mandī^́ dhāvati

9.058.04a     ā^́ yáyos triṃśátaṃ tánā
9.058.04b     sahásrāṇi ca dádmahe
9.058.04c     tárat sá mandī^́ dhāvati


9.059.01a     pávasva gojíd aśvajíd
9.059.01b     viśvajít soma raṇyajít
9.059.01c     prajā^́vad rátnam ā^́ bhara

9.059.02a     pávasvādbhyó ádābhiyaḥ
9.059.02b     pávasva óṣadhībhiyaḥ
9.059.02c     pávasva dhiṣáṇābhiyaḥ

9.059.03a     tuváṃ soma pávamāno
9.059.03b     víśvāni duritā^́ tara
9.059.03c     kavíḥ sīda ní barhíṣi

9.059.04a     pávamāna súvar vido
9.059.04b     jā^́yamāno 'bhavo mahā^́n
9.059.04c     índo víśvām̐ abhī^́d asi


9.060.01a     prá gāyatréṇa gāyata
9.060.01b     pávamānaṃ vícarṣaṇim
9.060.01c     índuṃ sahásracakṣasam

9.060.02a     táṃ tvā sahásracakṣasam
9.060.02b     átho sahásrabharṇasam
9.060.02c     áti vā^́ram apāviṣuḥ

9.060.03a     áti vā^́rān pávamāno asiṣyadat
9.060.03b     kaláśām̐ abhí dhāvati
9.060.03c     índrasya hā^́rdi āviśán

9.060.04a     índrasya soma rā^́dhase
9.060.04b     śám pavasva vicarṣaṇe
9.060.04c     prajā^́vad réta ā^́ bhara


9.061.01a     ayā^́ vītī^́ pári srava
9.061.01b     yás ta indo mádeṣu ā^́
9.061.01c     avā^́han navatī^́r náva

9.061.02a     púraḥ sadyá itthā^́dhiye
9.061.02b     dívodāsāya śámbaram
9.061.02c     ádha tyáṃ turváśaṃ yádum

9.061.03a     pári ṇo áśvam aśvavíd
9.061.03b     gómad indo híraṇyavat
9.061.03c     kṣárā sahasríṇīr íṣaḥ

9.061.04a     pávamānasya te vayám
9.061.04b     pavítram abhiundatáḥ
9.061.04c     sakhitvám ā^́ vr̥ṇīmahe

9.061.05a     yé te pavítram ūrmáyo
9.061.05b     abhikṣáranti dhā^́rayā
9.061.05c     tébhir naḥ soma mr̥̄ḷaya⁺

9.061.06a     sá naḥ punāná ā^́ bhara
9.061.06b     rayíṃ vīrávatīm íṣam
9.061.06c     ī^́śānaḥ soma viśvátaḥ

9.061.07a     etám u tyáṃ dáśa kṣípo
9.061.07b     mr̥jánti síndhumātaram
9.061.07c     sám ādityébhir akhyata

9.061.08a     sám índreṇotá vāyúnā
9.061.08b     sutá eti pavítra ā^́
9.061.08c     sáṃ sū^́riyasya raśmíbhiḥ

9.061.09a     sá no bhágāya vāyáve
9.061.09b     pūṣṇé pavasva mádhumān
9.061.09c     cā^́rur mitré váruṇe ca

9.061.10a     uccā^́ te jātám ándhaso
9.061.10b     diví ṣád bhū^́mi ā^́ dade
9.061.10c     ugráṃ śárma máhi śrávaḥ

9.061.11a     enā^́ víśvāni aryá ā^́
9.061.11b     dyumnā^́ni mā^́nuṣāṇãm
9.061.11c     síṣāsanto vanāmahe

9.061.12a     sá na índrāya yájyave
9.061.12b     váruṇāya marúdbhiyaḥ
9.061.12c     varivovít pári srava

9.061.13a     úpo ṣú jātám aptúraṃ
9.061.13b     góbhir bhaṅgám páriṣkr̥tam
9.061.13c     índuṃ devā^́ ayāsiṣuḥ

9.061.14a     tám íd vardhantu no gíro
9.061.14b     vatsáṃ saṃśíśvarīr iva
9.061.14c     yá índrasya hr̥daṃsániḥ

9.061.15a     árṣā ṇaḥ soma śáṃ gáve
9.061.15b     dhukṣásva pipyúṣīm íṣam
9.061.15c     várdhā samudrám ukthíyam

9.061.16a     pávamāno ajījanad
9.061.16b     diváś citráṃ ná tanyatúm
9.061.16c     jyótir vaiśvānarám br̥hát

9.061.17a     pávamānasya te ráso
9.061.17b     mádo rājann aduchunáḥ
9.061.17c     ví vā^́ram ávyam arṣati

9.061.18a     pávamāna rásas táva
9.061.18b     dákṣo ví rājati dyumā^́n
9.061.18c     jyótir víśvaṃ súvar dr̥śé

9.061.19a     yás te mádo váreṇiyas
9.061.19b     ténā pavasva ándhasā
9.061.19c     devāvī^́r aghaśaṃsahā^́

9.061.20a     jághnir vr̥trám amitríyaṃ
9.061.20b     sásnir vā^́jaṃ divé-dive
9.061.20c     goṣā^́ u aśvasā^́ asi

9.061.21a     sámmiślo aruṣó bhava
9.061.21b     sūpasthā^́bhir ná dhenúbhiḥ
9.061.21c     sī^́dañ chyenó ná yónim ā^́

9.061.22a     sá pavasva yá ā^́vitha
9.061.22b     índraṃ vr̥trā^́ya hántave
9.061.22c     vavrivā^́ṃsam mahī^́r apáḥ

9.061.23a     suvī^́rāso vayáṃ dhánā
9.061.23b     jáyema soma mīḍhuvaḥ
9.061.23c     punānó vardha no gíraḥ

9.061.24a     tuvótāsas távā^́vasā
9.061.24b     syā^́ma vanvánta āmúraḥ
9.061.24c     sóma vratéṣu jāgr̥hi

9.061.25a     apaghnán pavate mŕ̥dho
9.061.25b     ápa sómo árāvaṇaḥ
9.061.25c     gáchann índrasya niṣkr̥tám

9.061.26a     mahó no rāyá ā^́ bhara
9.061.26b     pávamāna jahī^́ mŕ̥dhaḥ
9.061.26c     rā^́svendo vīrávad yáśaḥ

9.061.27a     ná tvā śatáṃ caná hrúto
9.061.27b     rā^́dho dítsantam ā^́ minan
9.061.27c     yát punānó makhasyáse

9.061.28a     pávasvendo vŕ̥ṣā sutáḥ
9.061.28b     kr̥dhī^́ no yaśáso jáne
9.061.28c     víśvā ápa dvíṣo jahi

9.061.29a     ásya te sakhiyé vayáṃ
9.061.29b     távendo dyumná uttamé
9.061.29c     sāsahyā^́ma pr̥tanyatáḥ

9.061.30a     yā^́ te bhīmā^́ni ā^́yudhā
9.061.30b     tigmā^́ni sánti dhū^́rvaṇe
9.061.30c     rákṣā samasya no nidáḥ


9.062.01a     eté asr̥gram índavas
9.062.01b     tiráḥ pavítram āśávaḥ
9.062.01c     víśvāni abhí saúbhagā

9.062.02a     vighnánto duritā^́ purú
9.062.02b     sugā^́ tokā^́ya vājínaḥ
9.062.02c     tánā kr̥ṇvánto árvate

9.062.03a     kr̥ṇvánto várivo gáve
9.062.03b     abhí arṣanti suṣṭutím
9.062.03c     íḷām asmábhya° saṃyátam

9.062.04a     ásāvi aṃśúr mádāya
9.062.04b     apsú dákṣo giriṣṭhã^́ḥ
9.062.04c     śyenó ná yónim ā^́sadat

9.062.05a     śubhrám ándho devávātam
9.062.05b     apsú dhūtó nŕ̥bhiḥ sutáḥ
9.062.05c     svádanti gā^́vaḥ páyobhiḥ

9.062.06a     ā^́d īm áśvaṃ ná hétāro
9.062.06b     áśūśubhann amŕ̥tāya
9.062.06c     mádhvo rásaṃ sadhamā^́de

9.062.07a     yā^́s te dhā^́rā madhuścúto
9.062.07b     ásr̥gram inda ūtáye
9.062.07c     tā^́bhiḥ pavítram ā^́sadaḥ

9.062.08a     só arṣéndrāya pītáye
9.062.08b     tiró rómāṇi avyáyā
9.062.08c     sī^́dan yónā váneṣu ā^́

9.062.09a     tuvám indo pári srava
9.062.09b     svā^́diṣṭho áṅgirobhiyaḥ
9.062.09c     varivovíd ghr̥tám páyaḥ

9.062.10a     ayáṃ vícarṣaṇir hitáḥ
9.062.10b     pávamānaḥ sá cetati
9.062.10c     hinvāná ā^́piyam br̥hát

9.062.11a     eṣá vŕ̥ṣā vŕ̥ṣavrataḥ
9.062.11b     pávamāno aśastihā^́
9.062.11c     kárad vásūni dāśúṣe

9.062.12a     ā^́ pavasva sahasríṇaṃ
9.062.12b     rayíṃ gómantam aśvínam
9.062.12c     puruścandrám puruspŕ̥ham

9.062.13a     eṣá syá pári ṣicyate
9.062.13b     marmr̥jyámāna āyúbhiḥ
9.062.13c     urugāyáḥ kavíkratuḥ

9.062.14a     sahásrotiḥ śatā^́magho
9.062.14b     vimā^́no rájasaḥ kavíḥ
9.062.14c     índrāya pavate mádaḥ

9.062.15a     girā^́ jātá ihá stutá
9.062.15b     índur índrāya dhīyate
9.062.15c     vír yónā vasatā^́v iva

9.062.16a     pávamānaḥ sutó nŕ̥bhiḥ
9.062.16b     sómo vā^́jam ivāsarat
9.062.16c     camū^́ṣu śákmanāsádam

9.062.17a     táṃ tripr̥ṣṭhé trivandhuré
9.062.17b     ráthe yuñjanti yā^́tave
9.062.17c     ŕ̥ṣīṇāṃ saptá dhītíbhiḥ

9.062.18a     táṃ sotāro dhanaspŕ̥tam
9.062.18b     āśúṃ vā^́jāya yā^́tave
9.062.18c     háriṃ hinota vājínam

9.062.19a     āviśán kaláśaṃ sutó
9.062.19b     víśvā árṣann abhí śríyaḥ
9.062.19c     śū^́ro ná góṣu tiṣṭhati

9.062.20a     ā^́ ta indo mádāya kám
9.062.20b     páyo duhanti āyávaḥ
9.062.20c     devā^́ devébhiyo mádhu

9.062.21a     ā^́ naḥ sómam pavítra ā^́
9.062.21b     sr̥játā mádhumattamam
9.062.21c     devébhyo devaśrúttamam

9.062.22a     eté sómā asr̥kṣata
9.062.22b     gr̥ṇānā^́ḥ śrávase mahé
9.062.22c     madíntamasya dhā^́rayā

9.062.23a     abhí gávyāni vītáye
9.062.23b     nr̥mṇā^́ punānó arṣasi
9.062.23c     sanádvājaḥ pári srava

9.062.24a     utá no gómatīr íṣo
9.062.24b     víśvā arṣa pariṣṭúbhaḥ
9.062.24c     gr̥ṇānó jamádagninā

9.062.25a     pávasva vācó agriyáḥ
9.062.25b     sóma citrā^́bhir ūtíbhiḥ
9.062.25c     abhí víśvāni kā^́viyā

9.062.26a     tuváṃ samudríyā apó
9.062.26b     agriyó vā^́ca īráyan
9.062.26c     pávasva viśvamejaya

9.062.27a     túbhyemā^́ bhúvanā kave
9.062.27b     mahimné soma tasthire
9.062.27c     túbhyam arṣanti síndhavaḥ

9.062.28a     prá te divó ná vr̥ṣṭáyo
9.062.28b     dhā^́rā yanti asaścátaḥ
9.062.28c     abhí śukrā^́m upastíram

9.062.29a     índrāyéndum punītana
9.062.29b     ugráṃ dákṣāya sā^́dhanam
9.062.29c     īśānáṃ vītírādhasam

9.062.30a     pávamāna r̥táḥ kavíḥ
9.062.30b     sómaḥ pavítram ā^́sadat
9.062.30c     dádhat stotré suvī^́riyam


9.063.01a     ā^́ pavasva sahasríṇaṃ
9.063.01b     rayíṃ soma suvī^́riyam
9.063.01c     asmé śrávāṃsi dhāraya

9.063.02a     íṣam ū^́rjaṃ ca pinvasa
9.063.02b     índrāya matsaríntamaḥ
9.063.02c     camū^́ṣu ā^́ ní ṣīdasi

9.063.03a     sutá índrāya víṣṇave
9.063.03b     sómaḥ kaláśe akṣarat
9.063.03c     mádhumām̐ astu vāyáve

9.063.04a     eté asr̥gram āśávo
9.063.04b     áti hvárāṃsi babhrávaḥ
9.063.04c     sómā r̥tásya dhā^́rayā

9.063.05a     índraṃ várdhanto aptúraḥ
9.063.05b     kr̥ṇvánto víśvam ā^́riyam
9.063.05c     apaghnánto árāvaṇaḥ

9.063.06a     sutā^́ ánu svám ā^́ rájo
9.063.06b     abhí arṣanti babhrávaḥ
9.063.06c     índraṃ gáchanta índavaḥ

9.063.07a     ayā^́ pavasva dhā^́rayā
9.063.07b     yáyā sū^́ryam árocayaḥ
9.063.07c     hinvānó mā^́nuṣīr apáḥ

9.063.08a     áyukta sū^́ra étaśam
9.063.08b     pávamāno manā^́v ádhi
9.063.08c     antárikṣeṇa yā^́tave

9.063.09a     utá tyā^́ haríto dáśa
9.063.09b     sū^́ro ayukta yā^́tave
9.063.09c     índur índra íti bruván

9.063.10a     párītó vāyáve sutáṃ
9.063.10b     gíra índrāya matsarám
9.063.10c     ávyo vā^́reṣu siñcata

9.063.11a     pávamāna vidā^́ rayím
9.063.11b     asmábhyaṃ soma duṣṭáram
9.063.11c     yó dūṇā^́śo vanuṣyatā^́

9.063.12a     abhí arṣa sahasríṇaṃ
9.063.12b     rayíṃ gómantam aśvínam
9.063.12c     abhí vā^́jam utá śrávaḥ

9.063.13a     sómo devó ná sū^́riyo
9.063.13b     ádribhiḥ pavate sutáḥ
9.063.13c     dádhānaḥ kaláśe rásam

9.063.14a     eté dhā^́māni ā^́riyā
9.063.14b     śukrā^́ r̥tásya dhā^́rayā
9.063.14c     vā^́jaṃ gómantam akṣaran

9.063.15a     sutā^́ índrāya vajríṇe
9.063.15b     sómāso dádhiāśiraḥ
9.063.15c     pavítram áti akṣaran

9.063.16a     prá soma mádhumattamo
9.063.16b     rāyé arṣa pavítra ā^́
9.063.16c     mádo yó devavī^́tamaḥ

9.063.17a     tám ī mr̥janti āyávo
9.063.17b     háriṃ nadī^́ṣu vājínam
9.063.17c     índum índrāya matsarám

9.063.18a     ā^́ pavasva híraṇyavad
9.063.18b     áśvāvat soma vīrávat
9.063.18c     vā^́jaṃ gómantam ā^́ bhara

9.063.19a     pári vā^́je ná vājayúm
9.063.19b     ávyo vā^́reṣu siñcata
9.063.19c     índrāya mádhumattamam

9.063.20a     kavím mr̥janti márjiyaṃ
9.063.20b     dhībhír víprā avasyávaḥ
9.063.20c     vŕ̥ṣā kánikrad arṣati

9.063.21a     vŕ̥ṣaṇaṃ dhībhír aptúraṃ
9.063.21b     sómam r̥tásya dhā^́rayā
9.063.21c     matī^́ víprāḥ sám asvaran

9.063.22a     pávasva deva āyuṣág
9.063.22b     índraṃ gachatu te mádaḥ
9.063.22c     vāyúm ā^́ roha dhármaṇā

9.063.23a     pávamāna ní tośase
9.063.23b     rayíṃ soma śravā^́yiyam
9.063.23c     priyáḥ samudrám ā^́ viśa

9.063.24a     apaghnán pavase mŕ̥dhaḥ
9.063.24b     kratuvít soma matsaráḥ
9.063.24c     nudásvā^́devayuṃ jánam

9.063.25a     pávamānā asr̥kṣata
9.063.25b     sómāḥ śukrā^́sa índavaḥ
9.063.25c     abhí víśvāni kā^́viyā

9.063.26a     pávamānāsa āśávaḥ
9.063.26b     śubhrā^́ asr̥gram índavaḥ
9.063.26c     ghnánto víśvā ápa dvíṣaḥ

9.063.27a     pávamānā divás pári
9.063.27b     antárikṣād asr̥kṣata
9.063.27c     pr̥thivyā^́ ádhi sā^́navi

9.063.28a     punānáḥ soma dhā^́rayā
9.063.28b     índo víśvā ápa srídhaḥ
9.063.28c     jahí rákṣāṃsi sukrato

9.063.29a     apaghnán soma rakṣáso
9.063.29b     abhí arṣa kánikradat
9.063.29c     dyumántaṃ śúṣmam uttamám

9.063.30a     asmé vásūni dhāraya
9.063.30b     sóma divyā^́ni pā^́rthivā
9.063.30c     índo víśvāni vā^́riyā


9.064.01a     vŕ̥ṣā soma dyumā^́m̐ asi
9.064.01b     vŕ̥ṣā deva vŕ̥ṣavrataḥ
9.064.01c     vŕ̥ṣā dhármāṇi dadhiṣe

9.064.02a     vŕ̥ṣṇas te vŕ̥ṣṇiyaṃ śávo
9.064.02b     vŕ̥ṣā vánaṃ vŕ̥ṣā mádaḥ
9.064.02c     satyáṃ vr̥ṣan vŕ̥ṣéd asi

9.064.03a     áśvo ná cakrado vŕ̥ṣā
9.064.03b     sáṃ gā^́ indo sám árvataḥ
9.064.03c     ví no rāyé dúro vr̥dhi

9.064.04a     ásr̥kṣata prá vājíno
9.064.04b     gavyā^́ sómāso aśvayā^́
9.064.04c     śukrā^́so vīrayā^́śávaḥ

9.064.05a     śumbhámānā r̥tāyúbhir
9.064.05b     mr̥jyámānā gábhastiyoḥ
9.064.05c     pávante vā^́re avyáye

9.064.06a     té víśvā dāśúṣe vásu
9.064.06b     sómā divyā^́ni pā^́rthivā
9.064.06c     pávantām ā^́ntárikṣiyā

9.064.07a     pávamānasya viśvavit
9.064.07b     prá te sárgā asr̥kṣata
9.064.07c     sū^́ryasyeva ná raśmáyaḥ

9.064.08a     ketúṃ kr̥ṇván divás pári
9.064.08b     víśvā rūpā^́bhí arṣasi
9.064.08c     samudráḥ soma pinvase

9.064.09a     hinvānó vā^́cam iṣyasi
9.064.09b     pávamāna vídharmaṇi
9.064.09c     ákrān devó ná sū^́riyaḥ

9.064.10a     índuḥ paviṣṭa cétanaḥ
9.064.10b     priyáḥ kavīnã^́m matī^́
9.064.10c     sr̥jád áśvaṃ rathī^́r iva

9.064.11a     ūrmír yás te pavítra ā^́
9.064.11b     devāvī^́ḥ pariákṣarat
9.064.11c     sī^́dann r̥tásya yónim ā^́

9.064.12a     sá no arṣa pavítra ā^́
9.064.12b     mádo yó devavī^́tamaḥ
9.064.12c     índav índrāya pītáye

9.064.13a     iṣé pavasva dhā^́rayā
9.064.13b     mr̥jyámāno manīṣíbhiḥ
9.064.13c     índo rucā^́bhí gā^́ ihi

9.064.14a     punānó várivas kr̥dhi
9.064.14b     ū^́rjaṃ jánāya girvaṇaḥ
9.064.14c     háre sr̥jāná āśíram

9.064.15a     punānó devávītaya
9.064.15b     índrasya yāhi niṣkr̥tám
9.064.15c     dyutānó vājíbhir yatáḥ

9.064.16a     prá hinvānā^́sa índavo
9.064.16b     áchā samudrám āśávaḥ
9.064.16c     dhiyā^́ jūtā^́ asr̥kṣata

9.064.17a     marmr̥jānā^́sa āyávo
9.064.17b     vŕ̥thā samudrám índavaḥ
9.064.17c     ágmann r̥tásya yónim ā^́

9.064.18a     pári ṇo yāhi asmayúr
9.064.18b     víśvā vásūni ójasā
9.064.18c     pāhí naḥ śárma vīrávat

9.064.19a     mímāti váhnir étaśaḥ
9.064.19b     padáṃ yujāná ŕ̥kvabhiḥ
9.064.19c     prá yát samudrá ā^́hitaḥ

9.064.20a     ā^́ yád yóniṃ hiraṇyáyam
9.064.20b     āśúr r̥tásya sī^́dati
9.064.20c     jáhāti ápracetasaḥ

9.064.21a     abhí venā^́ anūṣata
9.064.21b     íyakṣanti prácetasaḥ
9.064.21c     májjanti ávicetasaḥ

9.064.22a     índrāyendo marútvate
9.064.22b     pávasva mádhumattamaḥ
9.064.22c     r̥tásya yónim āsádam

9.064.23a     táṃ tvā víprā vacovídaḥ
9.064.23b     pári ṣkr̥ṇvanti⁺ vedhásaḥ
9.064.23c     sáṃ tvā mr̥janti āyávaḥ

9.064.24a     rásaṃ te mitró aryamā^́
9.064.24b     píbanti váruṇaḥ kave
9.064.24c     pávamānasya marútaḥ

9.064.25a     tuváṃ soma vipaścítam
9.064.25b     punānó vā^́cam iṣyasi
9.064.25c     índo sahásrabharṇasam

9.064.26a     utó sahásrabharṇasaṃ
9.064.26b     vā^́caṃ soma makhasyúvam
9.064.26c     punāná indav ā^́ bhara

9.064.27a     punāná indav eṣãm
9.064.27b     púruhūta jánānãm
9.064.27c     priyáḥ samudrám ā^́ viśa

9.064.28a     dávidyutatiyā rucā^́
9.064.28b     pariṣṭóbhantiyā kr̥pā^́
9.064.28c     sómāḥ śukrā^́ gávāśiraḥ

9.064.29a     hinvānó hetŕ̥bhir yatá
9.064.29b     ā^́ vā^́jaṃ vājī^́ akramīt
9.064.29c     sī^́danto vanúṣo yathā

9.064.30a     r̥dhák soma suastáye
9.064.30b     saṃjagmānó diváḥ kavíḥ
9.064.30c     pávasva sū^́riyo dr̥śé


9.065.01a     hinvánti sū^́ram úsrayaḥ
9.065.01b     svásāro jāmáyas pátim
9.065.01c     mahā^́m índum mahīyúvaḥ

9.065.02a     pávamāna rucā^́-rucā
9.065.02b     devó devébhiyas pári
9.065.02c     víśvā vásūni ā^́ viśa

9.065.03a     ā^́ pavamāna suṣṭutíṃ
9.065.03b     vr̥ṣṭíṃ devébhiyo dúvaḥ
9.065.03c     iṣé pavasva saṃyátam

9.065.04a     vŕ̥ṣā hí ási bhānúnā
9.065.04b     dyumántaṃ tvā havāmahe
9.065.04c     pávamāna suādhíyaḥ

9.065.05a     ā^́ pavasva suvī^́riyam
9.065.05b     mándamānaḥ suāyudha
9.065.05c     ihó ṣú indav ā^́ gahi

9.065.06a     yád adbhíḥ pariṣicyáse
9.065.06b     mr̥jyámāno gábhastiyoḥ
9.065.06c     drúṇā sadhástham aśnuṣe

9.065.07a     prá sómāya viaśvavát
9.065.07b     pávamānāya gāyata
9.065.07c     mahé sahásracakṣase

9.065.08a     yásya várṇam madhuścútaṃ
9.065.08b     háriṃ hinvánti ádribhiḥ
9.065.08c     índum índrāya pītáye

9.065.09a     tásya te vājíno vayáṃ
9.065.09b     víśvā dhánāni jigyúṣaḥ
9.065.09c     sakhitvám ā^́ vr̥ṇīmahe

9.065.10a     vŕ̥ṣā pavasva dhā^́rayā
9.065.10b     marútvate ca matsaráḥ
9.065.10c     víśvā dádhāna ójasā

9.065.11a     táṃ tvā dhartā^́ram oṇíyoḥ
9.065.11b     pávamāna suvardŕ̥śam
9.065.11c     hinvé vā^́jeṣu vājínam

9.065.12a     ayā^́ cittó vipā^́náyā
9.065.12b     háriḥ pavasva dhā^́rayā
9.065.12c     yújaṃ vā^́jeṣu codaya

9.065.13a     ā^́ na indo mahī^́m íṣam
9.065.13b     pávasva viśvádarśataḥ
9.065.13c     asmábhyaṃ soma gātuvít

9.065.14a     ā^́ kaláśā anūṣata
9.065.14b     índo dhā^́rābhir ójasā
9.065.14c     éndrasya pītáye viśa

9.065.15a     yásya te mádiyaṃ rásaṃ
9.065.15b     tīvráṃ duhánti ádribhiḥ
9.065.15c     sá pavasvābhimātihā^́

9.065.16a     rā^́jā medhā^́bhir īyate
9.065.16b     pávamāno manā^́v ádhi
9.065.16c     antárikṣeṇa yā^́tave

9.065.17a     ā^́ na indo śatagvínaṃ
9.065.17b     gávām póṣaṃ suaśviyam
9.065.17c     váhā bhágattim ūtáye

9.065.18a     ā^́ naḥ soma sáho júvo
9.065.18b     rūpáṃ ná várcase bhara
9.065.18c     suṣvāṇó devávītaye

9.065.19a     árṣā soma dyumáttamo
9.065.19b     abhí dróṇāni róruvat
9.065.19c     sī^́dañ chyenó ná yónim ā^́

9.065.20a     apsā^́ índrāya vāyáve
9.065.20b     váruṇāya marúdbhiyaḥ
9.065.20c     sómo arṣati víṣṇave

9.065.21a     íṣaṃ tokā^́ya no dádhad
9.065.21b     asmábhyaṃ soma viśvátaḥ
9.065.21c     ā^́ pavasva sahasríṇam

9.065.22a     yé sómāsaḥ parāváti
9.065.22b     yé arvāváti sunviré
9.065.22c     yé vādáḥ śaryaṇā^́vati

9.065.23a     yá ārjīkéṣu kŕ̥tvasu
9.065.23b     yé mádhye pastíyānãm
9.065.23c     yé vā jáneṣu pañcásu

9.065.24a     té no vr̥ṣṭíṃ divás pári
9.065.24b     pávantām ā^́ suvī^́riyam
9.065.24c     svānā^́° devā^́sa índavaḥ

9.065.25a     pávate haryató hárir
9.065.25b     gr̥ṇānó jamádagninā
9.065.25c     hinvānó gór ádhi tvací

9.065.26a     prá śukrā^́so vayojúvo
9.065.26b     hinvānā^́so ná sáptayaḥ
9.065.26c     śrīṇānā^́ apsú mr̥ñjata

9.065.27a     táṃ tvā sutéṣu ābhúvo
9.065.27b     hinviré devátātaye
9.065.27c     sá pavasvānáyā rucā^́

9.065.28a     ā^́ te dákṣam mayobhúvaṃ
9.065.28b     váhnim adyā^́ vr̥ṇīmahe
9.065.28c     pã^́ntam ā^́ puruspŕ̥ham

9.065.29a     ā^́ mandrám ā^́ váreṇiyam
9.065.29b     ā^́ vípram ā^́ manīṣíṇam
9.065.29c     pã^́ntam ā^́ puruspŕ̥ham

9.065.30a     ā^́ rayím ā^́ sucetúnam
9.065.30b     ā^́ sukrato tanū^́ṣu ā^́
9.065.30c     pã^́ntam ā^́ puruspŕ̥ham


9.066.01a     pávasva viśvacarṣaṇe
9.066.01b     abhí víśvāni kā^́viyā
9.066.01c     sákhā sákhibhya ī^́ḍiyaḥ

9.066.02a     tā^́bhyāṃ víśvasya rājasi
9.066.02b     yé pavamāna dhā^́manī
9.066.02c     pratīcī^́ soma tasthátuḥ

9.066.03a     pári dhā^́māni yā^́ni te
9.066.03b     tuváṃ somāsi viśvátaḥ
9.066.03c     pávamāna rtúbhiḥ kave

9.066.04a     pávasva janáyann íṣo
9.066.04b     abhí víśvāni vā^́riyā
9.066.04c     sákhā sákhibhya ūtáye

9.066.05a     táva śukrā^́so arcáyo
9.066.05b     divás pr̥ṣṭhé ví tanvate
9.066.05c     pavítraṃ soma dhā^́mabhiḥ

9.066.06a     távemé saptá síndhavaḥ
9.066.06b     praśíṣaṃ soma sisrate
9.066.06c     túbhyaṃ dhāvanti dhenávaḥ

9.066.07a     prá soma yāhi dhā^́rayā
9.066.07b     sutá índrāya matsaráḥ
9.066.07c     dádhāno ákṣiti śrávaḥ

9.066.08a     sám u tvā dhībhír asvaran
9.066.08b     hinvatī^́ḥ saptá jāmáyaḥ
9.066.08c     vípram ājā^́ vivásvataḥ

9.066.09a     mr̥jánti tvā sám agrúvo
9.066.09b     ávye jīrā^́v ádhi ṣváṇi
9.066.09c     rebhó yád ajyáse váne

9.066.10a     pávamānasya te kave
9.066.10b     vā^́jin sárgā asr̥kṣata
9.066.10c     árvanto ná śravasyávaḥ

9.066.11a     áchā kóśam madhuścútam
9.066.11b     ásr̥graṃ vā^́re avyáye
9.066.11c     ávāvaśanta dhītáyaḥ

9.066.12a     áchā samudrám índavo
9.066.12b     ástaṃ gā^́vo ná dhenávaḥ
9.066.12c     ágmann r̥tásya yónim ā^́

9.066.13a     prá ṇa indo mahé ráṇa
9.066.13b     ā^́po arṣanti síndhavaḥ
9.066.13c     yád góbhir vāsayiṣyáse

9.066.14a     ásya te sakhiyé vayám
9.066.14b     íyakṣantas tuvótayaḥ
9.066.14c     índo sakhitvám uśmasi

9.066.15a     ā^́ pavasva gáviṣṭaye
9.066.15b     mahé soma nr̥cákṣase
9.066.15c     éndrasya jaṭháre viśa

9.066.16a     mahā^́m̐ asi soma jyéṣṭha
9.066.16b     ugrā^́ṇām inda ójiṣṭhaḥ
9.066.16c     yúdhvā sáñ cháśvaj jigetha

9.066.17a     yá ugrébhyaś cid ójīyāñ
9.066.17b     chū^́rebhyaś cic chū^́rataraḥ
9.066.17c     bhūridā^́bhyaś cin máṃhīyān

9.066.18a     tuváṃ soma sū^́ra éṣas
9.066.18b     tokásya sātā^́ tanū^́nām
9.066.18c     vr̥ṇīmáhe sakhiyā^́ya
9.066.18d     vr̥ṇīmáhe yújiyāya

9.066.19a     ágna ā^́yūṃṣi pavasa
9.066.19b     ā^́ suvórjam íṣaṃ ca naḥ
9.066.19c     āré bādhasva duchúnām

9.066.20a     agnír ŕ̥ṣiḥ pávamānaḥ
9.066.20b     pā^́ñcajanyaḥ puróhitaḥ
9.066.20c     tám īmahe mahāgayám

9.066.21a     ágne pávasva suápā
9.066.21b     asmé várcaḥ suvī^́riyam
9.066.21c     dádhad rayím máyi póṣam

9.066.22a     pávamāno áti srídho
9.066.22b     abhí arṣati suṣṭutím
9.066.22c     sū^́ro ná viśvádarśataḥ

9.066.23a     sá marmr̥jāná āyúbhiḥ
9.066.23b     práyasvān práyase hitáḥ
9.066.23c     índur átyo vicakṣaṇáḥ

9.066.24a     pávamāna r̥tám br̥hác
9.066.24b     chukráṃ jyótir ajījanat
9.066.24c     kr̥ṣṇā^́ támāṃsi jáṅghanat

9.066.25a     pávamānasya jáṅghnato
9.066.25b     háreś candrā^́ asr̥kṣata
9.066.25c     jīrā^́ ajiráśociṣaḥ

9.066.26a     pávamāno rathī^́tamaḥ
9.066.26b     śubhrébhiḥ śubhráśastamaḥ
9.066.26c     háriścandro marúdgaṇaḥ

9.066.27a     pávamāno ví aśnavad
9.066.27b     raśmíbhir vājasā^́tamaḥ
9.066.27c     dádhat stotré suvī^́riyam

9.066.28a     prá suvāná índur akṣāḥ
9.066.28b     pavítram áti avyáyam
9.066.28c     punāná índur índram ā^́

9.066.29a     eṣá sómo ádhi tvací
9.066.29b     gávāṃ krīḷati ádribhiḥ
9.066.29c     índram mádāya jóhuvat

9.066.30a     yásya te dyumnávat páyaḥ
9.066.30b     pávamānā^́bhr̥taṃ diváḥ
9.066.30c     téna no mr̥̄ḷa⁺ jīváse


9.067.01a     tuváṃ somāsi dhārayúr
9.067.01b     mandrá ójiṣṭho adhvaré
9.067.01c     pávasva maṃhayádrayiḥ

9.067.02a     tuváṃ sutó nr̥mā^́dano
9.067.02b     dadhanvā^́n matsaríntamaḥ
9.067.02c     índrāya sūrír ándhasā

9.067.03a     tuváṃ suṣvāṇó ádribhir
9.067.03b     abhí arṣa kánikradat
9.067.03c     dyumántaṃ śúṣmam uttamám

9.067.04a     índur hinvānó arṣati
9.067.04b     tiró vā^́rāṇi avyáyā
9.067.04c     hárir vā^́jam acikradat

9.067.05a     índo ví ávyam arṣasi
9.067.05b     ví śrávāṃsi ví saúbhagā
9.067.05c     ví vā^́jān soma gómataḥ

9.067.06a     ā^́ na indo śatagvínaṃ
9.067.06b     rayíṃ gómantam aśvínam
9.067.06c     bhárā soma sahasríṇam

9.067.07a     pávamānāsa índavas
9.067.07b     tiráḥ pavítram āśávaḥ
9.067.07c     índraṃ yā^́mebhir āśata

9.067.08a     kakuháḥ somiyó rása
9.067.08b     índur índrāya pūrviyáḥ
9.067.08c     āyúḥ pavata āyáve

9.067.09a     hinvánti sū^́ram úsrayaḥ
9.067.09b     pávamānam madhuścútam
9.067.09c     abhí girā^́ sám asvaran

9.067.10a     avitā^́ no ajā^́śuvaḥ
9.067.10b     pūṣā^́ yā^́mani-yāmani
9.067.10c     ā^́ bhakṣat kaníyāsu naḥ

9.067.11a     ayáṃ sómaḥ kapardíne
9.067.11b     ghr̥táṃ ná pavate mádhu
9.067.11c     ā^́ bhakṣat kaníyāsu naḥ

9.067.12a     ayáṃ ta āghr̥ṇe sutó
9.067.12b     ghr̥táṃ ná pavate śúci
9.067.12c     ā^́ bhakṣat kaníyāsu naḥ

9.067.13a     vācó jantúḥ kavīnã^́m
9.067.13b     pávasva soma dhā^́rayā
9.067.13c     devéṣu ratnadhā^́ asi

9.067.14a     ā^́ kaláśeṣu dhāvati
9.067.14b     śyenó várma ví gāhate
9.067.14c     abhí dróṇā kánikradat

9.067.15a     pári prá soma te ráso
9.067.15b     ásarji kaláśe sutáḥ
9.067.15c     śyenó ná taktó arṣati

9.067.16a     pávasva soma mandáyann
9.067.16b     índrāya mádhumattamaḥ

9.067.17a     ásr̥gran devávītaye
9.067.17b     vājayánto ráthā iva

9.067.18a     té sutā^́so madíntamāḥ
9.067.18b     śukrā^́ vāyúm asr̥kṣata

9.067.19a     grā^́vṇā tunnó abhíṣṭutaḥ
9.067.19b     pavítraṃ soma gachasi
9.067.19c     dádhat stotré suvī^́riyam

9.067.20a     eṣá tunnó abhíṣṭutaḥ
9.067.20b     pavítram áti gāhate
9.067.20c     rakṣohā^́ vā^́ram avyáyam

9.067.21a     yád ánti yác ca dūraké
9.067.21b     bhayáṃ vindáti mā^́m ihá
9.067.21c     pávamāna ví táj jahi

9.067.22a     pávamānaḥ só adyá naḥ
9.067.22b     pavítreṇa vícarṣaṇiḥ
9.067.22c     yáḥ potā^́ sá punātu naḥ

9.067.23a     yát te pavítram arcíṣi
9.067.23b     ágne vítatam antár ā^́
9.067.23c     bráhma téna punīhi naḥ

9.067.24a     yát te pavítram arcivád
9.067.24b     ágne téna punīhi naḥ
9.067.24c     brahmasavaíḥ punīhi naḥ

9.067.25a     ubhā^́bhyāṃ deva savitaḥ
9.067.25b     pavítreṇa savéna ca
9.067.25c     mã^́m punīhi viśvátaḥ

9.067.26a     tribhíṣ ṭváṃ deva savitar
9.067.26b     várṣiṣṭhaiḥ soma dhā^́mabhiḥ
9.067.26c     ágne dákṣaiḥ punīhi naḥ

9.067.27a     punántu mā^́ṃ devajanā^́ḥ
9.067.27b     punántu vásavo dhiyā^́
9.067.27c     víśve devāḥ punītá mā
9.067.27d     jā^́tavedaḥ punīhí mā

9.067.28a     prá pyāyasva prá syandasva
9.067.28b     sóma víśvebhir aṃśúbhiḥ
9.067.28c     devébhya uttamáṃ havíḥ

9.067.29a     úpa priyám pánipnataṃ
9.067.29b     yúvānam āhutīvŕ̥dham
9.067.29c     áganma bíbhrato námaḥ

9.067.30a     alā^́yiyasya paraśúr nanāśa
9.067.30b     tám ā^́ pavasva deva soma
9.067.30c     ākhúṃ cid evá deva soma

9.067.31a     yáḥ pāvamānī^́r adhyéti
9.067.31b     ŕ̥ṣibhiḥ sámbhr̥taṃ rásam
9.067.31c     sárvaṃ sá pūtám aśnāti
9.067.31d     svaditám mātaríśvanā

9.067.32a     pāvamānī^́r yó adhyéti
9.067.32b     ŕ̥ṣibhiḥ sámbhr̥taṃ rásam
9.067.32c     tásmai sárasvatī duhe
9.067.32d     kṣīráṃ sarpír mádhūdakám


9.068.01a     prá devám áchā mádhumanta índavo
9.068.01b     ásiṣyadanta gā^́va ā^́ ná dhenávaḥ
9.068.01c     barhiṣádo vacanā^́vanta ū^́dhabhiḥ
9.068.01d     parisrútam usríyā nirṇíjaṃ dhire

9.068.02a     sá róruvad abhí pū^́rvā acikradad
9.068.02b     upārúhaḥ śratháyan svādate háriḥ
9.068.02c     tiráḥ pavítram pariyánn urú jráyo
9.068.02d     ní śáryāṇi dadhate devá ā^́ váram

9.068.03a     ví yó mamé yamíyā saṃyatī^́ mádaḥ
9.068.03b     sākaṃvŕ̥dhā páyasā pinvad ákṣitā
9.068.03c     mahī^́ apāré rájasī vivévidad
9.068.03d     abhivrájann ákṣitam pā^́ja ā^́ dade

9.068.04a     sá mātárā vicáran vājáyann apáḥ
9.068.04b     prá médhiraḥ svadháyā pinvate padám
9.068.04c     aṃśúr yávena pipiśe yató nŕ̥bhiḥ
9.068.04d     sáṃ jāmíbhir násate rákṣate śíraḥ

9.068.05a     sáṃ dákṣeṇa mánasā jāyate kavír
9.068.05b     r̥tásya gárbho níhito yamā^́ paráḥ
9.068.05c     yū^́nā ha sántā prathamáṃ ví jajñatur
9.068.05d     gúhā hitáṃ jánima némam údyatam

9.068.06a     mandrásya rūpáṃ vividur manīṣíṇaḥ
9.068.06b     śyenó yád ándho ábharat parāvátaḥ
9.068.06c     tám marjayanta suvŕ̥dhaṃ nadī^́ṣu ā^́m̐
9.068.06d     uśántam aṃśúm pariyántam r̥gmíyam

9.068.07a     tuvā^́m mr̥janti dáśa yóṣaṇaḥ sutáṃ
9.068.07b     sóma ŕ̥ṣibhir matíbhir dhītíbhir hitám
9.068.07c     ávyo vā^́rebhir utá deváhūtibhir
9.068.07d     nŕ̥bhir yató vā^́jam ā^́ darṣi sātáye

9.068.08a     pariprayántaṃ vayíyaṃ suṣaṃsádaṃ
9.068.08b     sómam manīṣā^́ abhy ànūṣata stúbhaḥ
9.068.08c     yó dhā^́rayā mádhumām̐ ūrmíṇā divá
9.068.08d     íyarti vā^́caṃ rayiṣā^́ḷ ámartiyaḥ

9.068.09a     ayáṃ divá iyarti víśvam ā^́ rájaḥ
9.068.09b     sómaḥ punānáḥ kaláśeṣu sīdati
9.068.09c     adbhír góbhir mr̥jyate ádribhiḥ sutáḥ
9.068.09d     punāná índur várivo vidat priyám

9.068.10a     evā^́ naḥ soma pariṣicyámāno
9.068.10b     váyo dádhac citrátamam pavasva
9.068.10c     adveṣé dyā^́vāpr̥thivī^́ huvema
9.068.10d     dévā dhattá rayím asmé suvī^́ram


9.069.01a     íṣur ná dhánvan práti dhīyate matír
9.069.01b     vatsó ná mātúr úpa sarji ū^́dhani
9.069.01c     urúdhāreva duhe ágra āyatī^́
9.069.01d     ásya vratéṣu ápi sóma iṣyate

9.069.02a     úpo matíḥ pr̥cyáte sicyáte mádhu
9.069.02b     mandrā^́janī codate antár āsáni
9.069.02c     pávamānaḥ saṃtaníḥ praghnatā^́m iva
9.069.02d     mádhumān drapsáḥ pári vā^́ram arṣati

9.069.03a     ávye vadhūyúḥ pavate pári tvací
9.069.03b     śrathnīté naptī^́r áditer r̥táṃ yaté
9.069.03c     hárir akrān yajatáḥ saṃyató mádo
9.069.03d     nr̥mṇā^́ śíśāno mahiṣó ná śobhate

9.069.04a     ukṣā^́ mimāti práti yanti dhenávo
9.069.04b     devásya devī^́r úpa yanti niṣkr̥tám
9.069.04c     áty akramīd árjunaṃ vā^́ram avyáyam
9.069.04d     átkaṃ ná niktám pári sómo avyata

9.069.05a     ámr̥ktena rúśatā vā^́sasā hárir
9.069.05b     ámartiyo nirṇijānáḥ pári vyata
9.069.05c     divás pr̥ṣṭhám barháṇā nirṇíje kr̥ta
9.069.05d     upastáraṇaṃ camúvor nabhasmáyam

9.069.06a     sū^́ryasyeva raśmáyo drāvayitnávo
9.069.06b     matsarā^́saḥ prasúpaḥ sākám īrate
9.069.06c     tántuṃ tatám pári sárgāsa āśávo
9.069.06d     néndrād r̥té pavate dhā^́ma kíṃ caná

9.069.07a     síndhor iva pravaṇé nimná āśávo
9.069.07b     vŕ̥ṣacyutā mádāso gātúm āśata
9.069.07c     śáṃ no niveśé dvipáde cátuṣpade
9.069.07d     asmé vā^́jāḥ soma tiṣṭhantu kr̥ṣṭáyaḥ

9.069.08a     ā^́ naḥ pavasva vásumad dhíraṇyavad
9.069.08b     áśvāvad gómad yávamat suvī^́riyam
9.069.08c     yūyáṃ hí soma pitáro máma sthána
9.069.08d     divó mūrdhā^́naḥ prásthitā vayaskŕ̥taḥ

9.069.09a     eté sómāḥ pávamānāsa índraṃ
9.069.09b     ráthā iva prá yayuḥ sātím ácha
9.069.09c     sutā^́ḥ pavítram áti yanti ávyaṃ
9.069.09d     hitvī^́ vavríṃ haríto vr̥ṣṭím ácha

9.069.10a     índav índrāya br̥haté pavasva
9.069.10b     sumr̥̄ḷīkó⁺ anavadyó riśā^́dāḥ
9.069.10c     bhárā candrā^́ṇi gr̥ṇaté vásūni
9.069.10d     devaír dyāvāpr̥thivī prā^́vataṃ naḥ


9.070.01a     trír asmai saptá dhenávo duduhre
9.070.01b     satyā^́m āśíram pūrviyé víomani
9.070.01c     catvā^́ri anyā^́ bhúvanāni nirṇíje
9.070.01d     cā^́rūṇi cakre yád r̥taír ávardhata

9.070.02a     sá bhíkṣamāṇo amŕ̥tasya cā^́ruṇa
9.070.02b     ubhé dyā^́vā kā^́viyenā ví śaśrathe
9.070.02c     téjiṣṭhā apó maṃhánā pári vyata
9.070.02d     yádī devásya śrávasā sádo vidúḥ

9.070.03a     té asya santu ketávo ámr̥tyavo
9.070.03b     ádābhiyāso janúṣī ubhé ánu
9.070.03c     yébhir nr̥mṇā^́ ca devíyā ca punatá
9.070.03d     ā^́d íd rā^́jānam manánā agr̥bhṇata

9.070.04a     sá mr̥jyámāno daśábhiḥ sukármabhiḥ
9.070.04b     prá madhyamā^́su mātŕ̥ṣu pramé sácā
9.070.04c     vratā^́ni pānó amŕ̥tasya cā^́ruṇa
9.070.04d     ubhé nr̥cákṣā ánu paśyate víśau

9.070.05a     sá marmr̥jāná indriyā^́ya dhā^́yasa
9.070.05b     óbhé antā^́ ródasī harṣate hitáḥ
9.070.05c     vŕ̥ṣā śúṣmeṇa bādhate ví durmatī^́r
9.070.05d     ādédiśānaḥ śaryahéva śurúdhaḥ

9.070.06a     sá mātárā ná dádr̥śāna usríyo
9.070.06b     nā^́nadad eti marútām iva svanáḥ
9.070.06c     jānánn r̥tám prathamáṃ yát súvarṇaram
9.070.06d     práśastaye kám avr̥ṇīta sukrátuḥ

9.070.07a     ruváti bhīmó vr̥ṣabhás taviṣyáyā
9.070.07b     śŕ̥ṅge śíśāno háriṇī vicakṣaṇáḥ
9.070.07c     ā^́ yóniṃ sómaḥ súkr̥taṃ ní ṣīdati
9.070.07d     gavyáyī tvág bhavati nirṇíg avyáyī

9.070.08a     śúciḥ punānás tanúvam arepásam
9.070.08b     ávye hárir ní adhāviṣṭa sā^́navi
9.070.08c     júṣṭo mitrā^́ya váruṇāya vāyáve
9.070.08d     tridhā^́tu mádhu kriyate sukármabhiḥ

9.070.09a     pávasva soma devávītaye vŕ̥ṣā
9.070.09b     índrasya hā^́rdi somadhā^́nam ā^́ viśa
9.070.09c     purā^́ no bādhā^́d duritā^́ti pāraya
9.070.09d     kṣetravíd dhí díśa ā^́hā vipr̥chaté

9.070.10a     hitó ná sáptir abhí vā^́jam arṣa
9.070.10b     índrasyendo jaṭháram ā^́ pavasva
9.070.10c     nāvā^́ ná síndhum áti parṣi vidvā^́ñ
9.070.10d     chū^́ro ná yúdhyann áva no nidá spaḥ


9.071.01a     ā^́ dákṣiṇā sr̥jyate śuṣmī^́ āsádaṃ
9.071.01b     véti druhó rakṣásaḥ pāti jā^́gr̥viḥ
9.071.01c     hárir opaśáṃ kr̥ṇute nábhas páya
9.071.01d     upastíre camúvor bráhma nirṇíje

9.071.02a     prá kr̥ṣṭihéva śūṣá eti róruvad
9.071.02b     asuryàṃ várṇaṃ ní riṇīte asya tám
9.071.02c     jáhāti vavrím pitúr eti niṣkr̥tám
9.071.02d     upaprútaṃ kr̥ṇute nirṇíjaṃ tánā

9.071.03a     ádribhiḥ sutáḥ pavate gábhastiyor
9.071.03b     vr̥ṣāyáte nábhasā vépate matī^́
9.071.03c     sá modate násate sā^́dhate girā^́
9.071.03d     nenikté apsú yájate párīmaṇi

9.071.04a     pári dyukṣáṃ sáhasaḥ parvatāvŕ̥dham
9.071.04b     mádhvaḥ siñcanti harmiyásya sakṣáṇim
9.071.04c     ā^́ yásmin gā^́vaḥ suhutā^́da ū^́dhani
9.071.04d     mūrdháñ chrīṇánti agriyáṃ várīmabhiḥ

9.071.05a     sám ī ráthaṃ ná bhuríjor aheṣata
9.071.05b     dáśa svásāro áditer upástha ā^́
9.071.05c     jígād úpa jrayati gór apīcíyam
9.071.05d     padáṃ yád asya matúthā ájījanan

9.071.06a     śyenó ná yóniṃ sádanaṃ dhiyā^́ kr̥táṃ
9.071.06b     hiraṇyáyam āsádaṃ devá éṣati
9.071.06c     ā^́ ī riṇanti barhíṣi priyáṃ girā^́
9.071.06d     áśvo ná devā^́m̐ ápi eti yajñíyaḥ

9.071.07a     párā víakto aruṣó diváḥ kavír
9.071.07b     vŕ̥ṣā tripr̥ṣṭhó anaviṣṭa gā^́ abhí
9.071.07c     sahásraṇītir yátiḥ parāyátī
9.071.07d     rebhó ná pūrvī^́r uṣáso ví rājati

9.071.08a     tveṣáṃ rūpáṃ kr̥ṇute várṇo asya sá
9.071.08b     yátrā^́śayat sámr̥tā sédhati sridháḥ
9.071.08c     apsā^́ yāti svadháyā daíviyaṃ jánaṃ
9.071.08d     sáṃ suṣṭutī^́ násate sáṃ góagrayā

9.071.09a     ukṣéva yūthā^́ pariyánn arāvīd
9.071.09b     ádhi tvíṣīr adhita sū^́riyasya
9.071.09c     divyáḥ suparṇó áva cakṣata kṣā^́ṃ
9.071.09d     sómaḥ pári krátunā paśyate jā^́ḥ


9.072.01a     hárim mr̥janti aruṣó ná yujyate
9.072.01b     sáṃ dhenúbhiḥ kaláśe sómo ajyate
9.072.01c     úd vā^́cam īráyati hinváte matī^́
9.072.01d     puruṣṭutásya káti cit paripríyaḥ

9.072.02a     sākáṃ vadanti bahávo manīṣíṇa
9.072.02b     índrasya sómaṃ jaṭháre yád āduhúḥ
9.072.02c     yádī mr̥jánti súgabhastayo náraḥ
9.072.02d     sánīḷābhir daśábhiḥ kā^́miyam mádhu

9.072.03a     áramamāṇo áti eti gā^́ abhí
9.072.03b     sū^́ryasya priyáṃ duhitús tiró rávam
9.072.03c     ánv asmai jóṣam abharad vinaṃgr̥sáḥ
9.072.03d     sáṃ dvayī^́bhiḥ svásr̥bhiḥ kṣeti jāmíbhiḥ

9.072.04a     nŕ̥dhūto ádriṣuto barhíṣi priyáḥ
9.072.04b     pátir gávām pradíva índur r̥tvíyaḥ
9.072.04c     púraṃdhivān mánuṣo yajñasā^́dhanaḥ
9.072.04d     śúcir dhiyā^́ pavate sóma indra te

9.072.05a     nŕ̥bāhúbhyāṃ coditó dhā^́rayā sutó
9.072.05b     anuṣvadhám pavate sóma indra te
9.072.05c     ā^́prāḥ krátūn sám ajair adhvaré matī^́r
9.072.05d     vér ná druṣác camúvor ā^́sadad dháriḥ

9.072.06a     aṃśúṃ duhanti stanáyantam ákṣitaṃ
9.072.06b     kavíṃ kaváyo apáso manīṣíṇaḥ
9.072.06c     sám ī gā^́vo matáyo yanti saṃyáta
9.072.06d     r̥tásya yónā sádane punarbhúvaḥ

9.072.07a     nā^́bhā pr̥thivyā^́ dharúṇo mahó divó
9.072.07b     apā^́m ūrmaú síndhuṣu antár ukṣitáḥ
9.072.07c     índrasya vájro vr̥ṣabhó vibhū^́vasuḥ
9.072.07d     sómo hr̥dé pavate cā^́ru matsaráḥ

9.072.08a     sá tū^́ pavasva pári pā^́rthivaṃ rája
9.072.08b     stotré śíkṣann ādhūnvaté ca sukrato
9.072.08c     mā^́ no nír bhāg vásunaḥ sādanaspŕ̥śo
9.072.08d     rayím piśáṅgam bahuláṃ vasīmahi

9.072.09a     ā^́ tū^́ na indo śatádātu áśviyaṃ
9.072.09b     sahásradātu paśumád dhíraṇyavat
9.072.09c     úpa māsva br̥hatī^́ revátīr íṣo
9.072.09d     ádhi stotrásya pavamāna no gahi


9.073.01a     srákve drapsásya dhámataḥ sám asvarann
9.073.01b     r̥tásya yónā sám aranta nā^́bhayaḥ
9.073.01c     trī^́n sá mūrdhnó ásuraś cakra ārábhe
9.073.01d     satyásya nā^́vaḥ sukŕ̥tam apīparan

9.073.02a     samyák samyáñco mahiṣā^́ aheṣata
9.073.02b     síndhor ūrmā^́v ádhi venā^́ avīvipan
9.073.02c     mádhor dhā^́rābhir janáyanto arkám ít
9.073.02d     priyā^́m índrasya tanúvam avīvr̥dhan

9.073.03a     pavítravantaḥ pári vā^́cam āsate
9.073.03b     pitaíṣām pratnó abhí rakṣati vratám
9.073.03c     maháḥ samudráṃ váruṇas tiró dadhe
9.073.03d     dhī^́rā íc chekur dharúṇeṣu ārábham

9.073.04a     sahásradhāre áva té sám asvaran
9.073.04b     divó nā^́ke mádhujihvā asaścátaḥ
9.073.04c     ásya spáśo ná ní miṣanti bhū^́rṇayaḥ
9.073.04d     padé-pade pāśínaḥ santi sétavaḥ

9.073.05a     pitúr mātúr ádhi ā^́ yé samásvarann
9.073.05b     r̥cā^́ śócantaḥ saṃdáhanto avratā^́n
9.073.05c     índradviṣṭām ápa dhamanti māyáyā
9.073.05d     tvácam ásiknīm bhū^́mano divás pári

9.073.06a     pratnā^́n mā^́nād ádhi ā^́ yé samásvarañ
9.073.06b     chlókayantrāso rabhasásya mántavaḥ
9.073.06c     ápānakṣā^́so badhirā^́ ahāsata
9.073.06d     r̥tásya pánthāṃ ná taranti duṣkŕ̥taḥ

9.073.07a     sahásradhāre vítate pavítra ā^́
9.073.07b     vā^́cam punanti kaváyo manīṣíṇaḥ
9.073.07c     rudrā^́sa eṣām iṣirā^́so adrúha
9.073.07d     spáśaḥ suáñcaḥ sudŕ̥śo nr̥cákṣasaḥ

9.073.08a     r̥tásya gopā^́ ná dábhāya sukrátus
9.073.08b     trī^́ ṣá pavítrā hr̥dí antár ā^́ dadhe
9.073.08c     vidvā^́n sá víśvā bhúvanābhí paśyati
9.073.08d     ávā^́juṣṭān vidhyati karté avratā^́n

9.073.09a     r̥tásya tántur vítataḥ pavítra ā^́
9.073.09b     jihvā^́yā ágre váruṇasya māyáyā
9.073.09c     dhī^́rāś cit tát samínakṣanta āśata
9.073.09d     átrā kartám áva padāti áprabhuḥ


9.074.01a     śíśur ná jātó áva cakradad váne
9.074.01b     súvar yád vājī^́ aruṣáḥ síṣāsati
9.074.01c     divó rétasā sacate payovŕ̥dhā
9.074.01d     tám īmahe sumatī^́ śárma sapráthaḥ

9.074.02a     divó yá skambhó dharúṇaḥ súātata
9.074.02b     ā^́pūrṇo aṃśúḥ pariéti viśvátaḥ
9.074.02c     sémé mahī^́ ródasī yakṣad āvŕ̥tā
9.074.02d     samīcīné dādhāra sám íṣaḥ kavíḥ

9.074.03a     máhi psáraḥ súkr̥taṃ somiyám mádhu
9.074.03b     urvī^́ gávyūtir áditer r̥táṃ yaté
9.074.03c     ī^́śe yó vr̥ṣṭér itá usríyo vŕ̥ṣā
9.074.03d     apā^́ṃ netā^́ yá itáūtir r̥gmíyaḥ

9.074.04a     ātmanván nábho duhyate ghr̥tám páya
9.074.04b     r̥tásya nā^́bhir amŕ̥taṃ ví jāyate
9.074.04c     samīcīnā^́ḥ sudā^́navaḥ priṇanti° táṃ
9.074.04d     náro hitám áva mehanti péravaḥ

9.074.05a     árāvīd aṃśúḥ sácamāna ūrmíṇā
9.074.05b     devāvíyam mánuṣe pinvati tvácam
9.074.05c     dádhāti gárbham áditer upástha ā^́
9.074.05d     yéna tokáṃ ca tánayaṃ ca dhā^́mahe

9.074.06a     sahásradhāre áva tā^́ asaścátas
9.074.06b     tr̥tī^́ye santu rájasi prajā^́vatīḥ
9.074.06c     cátasro nā^́bho níhitā avó divó
9.074.06d     havír bharanti amŕ̥taṃ ghr̥taścútaḥ

9.074.07a     śvetáṃ rūpáṃ kr̥ṇute yát síṣāsati
9.074.07b     sómo mīḍhvā^́m̐ ásuro veda bhū^́manaḥ
9.074.07c     dhiyā^́ śámī sacate sém abhí pravád
9.074.07d     divás kávandham áva darṣad udríṇam

9.074.08a     ádha śvetáṃ kaláśaṃ góbhir aktáṃ
9.074.08b     kā^́rṣmann ā^́ vājī^́ akramīt sasavā^́n
9.074.08c     ā^́ hinvire mánasā devayántaḥ
9.074.08d     kakṣī^́vate śatáhimāya gónām

9.074.09a     adbhíḥ soma papr̥cānásya te ráso
9.074.09b     ávyo vā^́raṃ ví pavamāna dhāvati
9.074.09c     sá mr̥jyámānaḥ kavíbhir madintama
9.074.09d     svádasvéndrāya pavamāna pītáye


9.075.01a     abhí priyā^́ṇi pavate cánohito
9.075.01b     nā^́māni yahvó ádhi yéṣu várdhate
9.075.01c     ā^́ sū^́riyasya br̥ható br̥hánn ádhi
9.075.01d     ráthaṃ víṣvañcam aruhad vicakṣaṇáḥ

9.075.02a     r̥tásya jihvā^́ pavate mádhu priyáṃ
9.075.02b     vaktā^́ pátir dhiyó asyā^́ ádābhiyaḥ
9.075.02c     dádhāti putráḥ pitarór⁺ apīcíyaṃ
9.075.02d     nā^́ma tr̥tī^́yam ádhi rocané diváḥ

9.075.03a     áva dyutānáḥ kaláśām̐ acikradan
9.075.03b     nŕ̥bhir yemānáḥ kóśa ā^́ hiraṇyáye
9.075.03c     abhī^́m r̥tásya dohánā anūṣata
9.075.03d     ádhi tripr̥ṣṭhá uṣáso ví rājati

9.075.04a     ádribhiḥ sutó matíbhiś cánohitaḥ
9.075.04b     prarocáyan ródasī mātárā śúciḥ
9.075.04c     rómāṇi ávyā samáyā ví dhāvati
9.075.04d     mádhor dhā^́rā pínvamānā divé-dive

9.075.05a     pári soma prá dhanuvā suastáye
9.075.05b     nŕ̥bhiḥ punānó abhí vāsayāśíram
9.075.05c     yé te mádā āhanáso víhāyasas
9.075.05d     tébhir índraṃ codaya dā^́tave maghám


9.076.01a     dhartā^́ diváḥ pavate kŕ̥tviyo ráso
9.076.01b     dákṣo devā^́nām anumā^́diyo nŕ̥bhiḥ
9.076.01c     háriḥ sr̥jānó átiyo ná sátvabhir
9.076.01d     vŕ̥thā pā^́jāṃsi kr̥ṇute nadī^́ṣu ā^́

9.076.02a     śū^́ro ná dhatta ā^́yudhā gábhastiyoḥ
9.076.02b     súvaḥ síṣāsan rathiró gáviṣṭiṣu
9.076.02c     índrasya śúṣmam īráyann apasyúbhir
9.076.02d     índur hinvānó ajyate manīṣíbhiḥ

9.076.03a     índrasya soma pávamāna ūrmíṇā
9.076.03b     taviṣyámāṇo jaṭháreṣu ā^́ viśa
9.076.03c     prá ṇaḥ pinva vidyúd abhréva ródasī
9.076.03d     dhiyā^́ ná vā^́jām̐ úpa māsi śáśvataḥ

9.076.04a     víśvasya rā^́jā pavate suvardŕ̥śa
9.076.04b     r̥tásya dhītím r̥ṣiṣā^́ḷ avīvaśat
9.076.04c     yáḥ sū^́riyasya ásireṇa mr̥jyáte
9.076.04d     pitā^́ matīnā^́m ásamaṣṭakāviyaḥ

9.076.05a     vŕ̥ṣeva yūthā^́ pári kóśam arṣasi
9.076.05b     apā^́m upásthe vr̥ṣabháḥ kánikradat
9.076.05c     sá índrāya pavase matsaríntamo
9.076.05d     yáthā jéṣāma samithé tuvótayaḥ


9.077.01a     eṣá prá kóśe mádhumām̐ acikradad
9.077.01b     índrasya vájro vápuṣo vápuṣṭaraḥ
9.077.01c     abhī^́m r̥tásya sudúghā ghr̥taścúto
9.077.01d     vāśrā^́ arṣanti páyaseva dhenávaḥ

9.077.02a     sá pūrviyáḥ pavate yáṃ divás pári
9.077.02b     śyenó mathāyád iṣitás tiró rájaḥ
9.077.02c     sá mádhva ā^́ yuvate vévijāna ít
9.077.02d     kr̥śā^́nor ástur mánasā^́ha bibhyúṣā

9.077.03a     té naḥ pū^́rvāsa úparāsa índavo
9.077.03b     mahé vā^́jāya dhanuvantu gómate
9.077.03c     īkṣeṇíyāso ahíyo ná cā^́ravo
9.077.03d     bráhma-brahma yé jujuṣúr havír-haviḥ

9.077.04a     ayáṃ no vidvā^́n vanavad vanuṣyatá
9.077.04b     índuḥ satrā^́cā mánasā puruṣṭutáḥ
9.077.04c     inásya yáḥ sádane gárbham ādadhé
9.077.04d     gávām urubjám abhí árṣati vrajám

9.077.05a     cákrir diváḥ pavate kŕ̥tviyo ráso
9.077.05b     mahā^́m̐ ádabdho váruṇo hurúg yaté
9.077.05c     ásāvi mitró vr̥jáneṣu yajñíyo
9.077.05d     átyo ná yūthé vr̥ṣayúḥ kánikradat


9.078.01a     prá rā^́jā vā^́caṃ janáyann asiṣyadad
9.078.01b     apó vásāno abhí gā^́ iyakṣati
9.078.01c     gr̥bhṇā^́ti riprám ávir asya tā^́nuvā
9.078.01d     śuddhó devā^́nām úpa yāti niṣkr̥tám

9.078.02a     índrāya soma pári ṣicyase nŕ̥bhir
9.078.02b     nr̥cákṣā ūrmíḥ kavír ajyase váne
9.078.02c     pūrvī^́r hí te srutáyaḥ sánti yā^́tave
9.078.02d     sahásram áśvā hárayaś camūṣádaḥ

9.078.03a     samudríyā apsaráso manīṣíṇam
9.078.03b     ā^́sīnā antár abhí sómam akṣaran
9.078.03c     tā^́ īṃ hinvanti harmiyásya sakṣáṇiṃ
9.078.03d     yā^́cante sumnám pávamānam ákṣitam

9.078.04a     gojín naḥ sómo rathajíd dhiraṇyajít
9.078.04b     suvarjíd abjít pavate sahasrajít
9.078.04c     yáṃ devā^́saś cakriré pītáye mádaṃ
9.078.04d     svā^́diṣṭhaṃ drapsám aruṇám mayobhúvam

9.078.05a     etā^́ni soma pávamāno asmayúḥ
9.078.05b     satyā^́ni kr̥ṇván dráviṇāni arṣasi
9.078.05c     jahí śátrum antiké dūraké ca yá
9.078.05d     urvī^́ṃ gávyūtim ábhayaṃ ca nas kr̥dhi


9.079.01a     acodáso no dhanuvantu índavaḥ
9.079.01b     prá svānā^́so° br̥háddiveṣu hárayaḥ
9.079.01c     ví ca náśan na iṣó árātayo
9.079.01d     aryó naśanta sániṣanta no dhíyaḥ

9.079.02a     prá ṇo dhanvantu índavo madacyúto
9.079.02b     dhánā vā yébhir árvato junīmási
9.079.02c     tiró mártasya kásya cit párihvr̥tiṃ
9.079.02d     vayáṃ dhánāni viśvádhā bharemahi

9.079.03a     utá svásyā árātiyā arír hí ṣá
9.079.03b     utā^́nyásyā árātiyā vŕ̥ko hí ṣáḥ
9.079.03c     dhánvan ná tŕ̥ṣṇā sám arīta tā^́m̐ abhí
9.079.03d     sóma jahí pavamāna durādhíyaḥ

9.079.04a     diví te nā^́bhā paramó yá ādadé
9.079.04b     pr̥thivyā^́s te ruruhuḥ sā^́navi kṣípaḥ
9.079.04c     ádrayas tvā bapsati gór ádhi tvací
9.079.04d     apsú tvā hástair duduhur manīṣíṇaḥ

9.079.05a     evā^́ ta indo subhúvaṃ supéśasaṃ
9.079.05b     rásaṃ tuñjanti prathamā^́ abhiśríyaḥ
9.079.05c     nídaṃ-nidam pavamāna ní tāriṣa
9.079.05d     āvís te śúṣmo bhavatu priyó mádaḥ


9.080.01a     sómasya dhā^́rā pavate nr̥cákṣasa
9.080.01b     r̥téna devā^́n havate divás pári
9.080.01c     bŕ̥haspáte raváthenā ví didyute
9.080.01d     samudrā^́so ná sávanāni vivyacuḥ

9.080.02a     yáṃ tvā vājinn aghniyā^́ abhy ánūṣata
9.080.02b     áyohataṃ yónim ā^́ rohasi dyumā^́n
9.080.02c     maghónām ā^́yuḥ pratirán máhi śráva
9.080.02d     índrāya soma pavase vŕ̥ṣā mádaḥ

9.080.03a     éndrasya kukṣā^́ pavate madíntama
9.080.03b     ū^́rjaṃ vásānaḥ śrávase sumaṅgálaḥ
9.080.03c     pratyáṅ sá víśvā bhúvanābhí paprathe
9.080.03d     krī^́ḷan hárir átiyaḥ syandate vŕ̥ṣā

9.080.04a     táṃ tvā devébhyo mádhumattamaṃ náraḥ
9.080.04b     sahásradhāraṃ duhate dáśa kṣípaḥ
9.080.04c     nŕ̥bhiḥ soma prácyuto grā^́vabhiḥ sutó
9.080.04d     víśvān devā^́m̐ ā^́ pavasvā sahasrajit

9.080.05a     táṃ tvā hastíno mádhumantam ádribhir
9.080.05b     duhánti apsú vr̥ṣabháṃ dáśa kṣípaḥ
9.080.05c     índraṃ soma mādáyan daíviyaṃ jánaṃ
9.080.05d     síndhor ivormíḥ pávamāno arṣasi


9.081.01a     prá sómasya pávamānasya ūrmáya
9.081.01b     índrasya yanti jaṭháraṃ supéśasaḥ
9.081.01c     dadhnā^́ yád īm únnītā yaśásā gávāṃ
9.081.01d     dānā^́ya śū^́ram udámandiṣuḥ sutā^́ḥ

9.081.02a     áchā hí sómaḥ kaláśām̐ ásiṣyadad
9.081.02b     átyo ná vóḷhā raghúvartanir vŕ̥ṣā
9.081.02c     áthā devā^́nām ubháyasya jánmano
9.081.02d     vidvā^́m̐ aśnoti amúta itáś ca yát

9.081.03a     ā^́ naḥ soma pávamānaḥ kirā vásu
9.081.03b     índo bháva maghávā rā^́dhaso maháḥ
9.081.03c     śíkṣā vayodho vásave sú cetúnā
9.081.03d     mā^́ no gáyam āré asmát párā sicaḥ

9.081.04a     ā^́ naḥ pūṣā^́ pávamānaḥ surātáyo
9.081.04b     mitró gachantu váruṇaḥ sajóṣasaḥ
9.081.04c     bŕ̥haspátir marúto vāyúr aśvínā
9.081.04d     tváṣṭā savitā^́ suyámā sárasvatī

9.081.05a     ubhé dyā^́vāpr̥thivī^́ viśvaminvé
9.081.05b     aryamā^́ devó áditir vidhātā^́
9.081.05c     bhágo nŕ̥śáṃsa urú antárikṣaṃ
9.081.05d     víśve devā^́ḥ pávamānaṃ juṣanta


9.082.01a     ásāvi sómo aruṣó vŕ̥ṣā hárī
9.082.01b     rā^́jeva dasmó abhí gā^́ acikradat
9.082.01c     punānó vā^́ram pári eti avyáyaṃ
9.082.01d     śyenó ná yóniṃ ghr̥távantam āsádam

9.082.02a     kavír vedhasyā^́ pári eṣi mā^́hinam
9.082.02b     átyo ná mr̥ṣṭó abhí vā^́jam arṣasi
9.082.02c     apasédhan duritā^́ soma mr̥̄ḷaya⁺
9.082.02d     ghr̥táṃ vásānaḥ pári yāsi nirṇíjam

9.082.03a     parjányaḥ pitā^́ mahiṣásya parṇíno
9.082.03b     nā^́bhā pr̥thivyā^́ giríṣu kṣáyaṃ dadhe
9.082.03c     svásāra ā^́po abhí gā^́ utā^́saran
9.082.03d     sáṃ grā^́vabhir nasate vīté adhvaré

9.082.04a     jāyéva pátyāv ádhi śéva maṃhase
9.082.04b     pájrāyā garbha śr̥ṇuhí brávīmi te
9.082.04c     antár vā^́ṇīṣu prá carā sú jīváse
9.082.04d     anindiyó vr̥jáne soma jāgr̥hi

9.082.05a     yáthā pū^́rvebhyaḥ śatasā^́ ámr̥dhraḥ
9.082.05b     sahasrasā^́ḥ paryáyā vā^́jam indo
9.082.05c     evā^́ pavasva suvitā^́ya návyase
9.082.05d     táva vratám ánu ā^́paḥ sacante


9.083.01a     pavítraṃ te vítatam brahmaṇas pate
9.083.01b     prabhúr gā^́trāṇi pári eṣi viśvátaḥ
9.083.01c     átaptatanūr ná tád āmó aśnute
9.083.01d     śr̥tā^́sa íd váhantas tát sám āśata

9.083.02a     tápoṣ pavítraṃ vítataṃ divás padé
9.083.02b     śócanto asya tántavo ví asthiran
9.083.02c     ávanti asya pavītā^́ram āśávo
9.083.02d     divás pr̥ṣṭhám ádhi tiṣṭhanti cétasā

9.083.03a     árūrucad uṣásaḥ pŕ̥śnir agriyá
9.083.03b     ukṣā^́ bibharti bhúvanāni vājayúḥ
9.083.03c     māyāvíno mamire asya māyáyā
9.083.03d     nr̥cákṣasaḥ pitáro gárbham ā^́ dadhuḥ

9.083.04a     gandharvá itthā^́ padám asya rakṣati
9.083.04b     pā^́ti devā^́nāṃ jánimāni ádbhutaḥ
9.083.04c     gr̥bhṇā^́ti ripúṃ nidháyā nidhā^́patiḥ
9.083.04d     sukŕ̥ttamā mádhuno bhakṣám āśata

9.083.05a     havír haviṣmo máhi sádma daíviyaṃ
9.083.05b     nábho vásānaḥ pári yāsi adhvarám
9.083.05c     rā^́jā pavítraratho vā^́jam ā^́ruhaḥ
9.083.05d     sahásrabhr̥ṣṭir jayasi śrávo br̥hát


9.084.01a     pávasva devamā^́dano vícarṣaṇir
9.084.01b     apsā^́ índrāya váruṇāya vāyáve
9.084.01c     kr̥dhī^́ no adyá várivaḥ suastimád
9.084.01d     urukṣitaú gr̥ṇīhi daíviyaṃ jánam

9.084.02a     ā^́ yás tasthaú bhúvanāni ámartiyo
9.084.02b     víśvāni sómaḥ pári tā^́ni arṣati
9.084.02c     kr̥ṇván saṃcŕ̥taṃ vicŕ̥tam abhíṣṭaya
9.084.02d     índuḥ siṣakti uṣásaṃ ná sū^́riyaḥ

9.084.03a     ā^́ yó góbhiḥ sr̥jyáta óṣadhīṣu ā^́
9.084.03b     devā^́nāṃ sumná iṣáyann úpāvasuḥ
9.084.03c     ā^́ vidyútā pavate dhā^́rayā sutá
9.084.03d     índraṃ sómo mādáyan daíviyaṃ jánam

9.084.04a     eṣá syá sómaḥ pavate sahasrajíd
9.084.04b     dhinvānó vā^́cam iṣirā^́m uṣarbúdham
9.084.04c     índuḥ samudrám úd iyarti vāyúbhir
9.084.04d     éndrasya hā^́rdi kaláśeṣu sīdati

9.084.05a     abhí tyáṃ gā^́vaḥ páyasā payovŕ̥dhaṃ
9.084.05b     sómaṃ śrīṇanti matíbhiḥ suvarvídam
9.084.05c     dhanaṃjayáḥ pavate kŕ̥tviyo ráso
9.084.05d     vípraḥ kavíḥ kā^́viyenā súvarcanāḥ


9.085.01a     índrāya soma súṣutaḥ pári srava
9.085.01b     ápā^́mīvā bhavatu rákṣasā sahá
9.085.01c     mā^́ te rásasya matsata dvayāvíno
9.085.01d     dráviṇasvanta ihá santu índavaḥ

9.085.02a     asmā^́n samaryé pavamāna codaya
9.085.02b     dákṣo devā^́nām ási hí priyó mádaḥ
9.085.02c     jahí śátrūm̐r abhí ā^́ bhandanāyatáḥ
9.085.02d     píbendra sómam áva no mŕ̥dho jahi

9.085.03a     ádabdha indo pavase madíntama
9.085.03b     ātméndrasya bhavasi dhāsír uttamáḥ
9.085.03c     abhí svaranti bahávo manīṣíṇo
9.085.03d     rā^́jānam asyá bhúvanasya niṃsate

9.085.04a     sahásraṇīthaḥ śatádhāro ádbhuta
9.085.04b     índrāyénduḥ pavate kā^́miyam mádhu
9.085.04c     jáyan kṣétram abhí arṣā jáyann apá
9.085.04d     urúṃ no gātúṃ kr̥ṇu soma mīḍhuvaḥ

9.085.05a     kánikradat kaláśe góbhir ajyase
9.085.05b     ví avyáyaṃ samáyā vā^́ram arṣasi
9.085.05c     marmr̥jyámāno átiyo ná sānasír
9.085.05d     índrasya soma jaṭháre sám akṣaraḥ

9.085.06a     svādúḥ pavasva diviyā^́ya jánmane
9.085.06b     svādúr índrāya suhávītunāmane
9.085.06c     svādúr mitrā^́ya váruṇāya vāyáve
9.085.06d     bŕ̥haspátaye mádhumām̐ ádābhiyaḥ

9.085.07a     átyam mr̥janti kaláśe dáśa kṣípaḥ
9.085.07b     prá víprāṇām matáyo vā^́ca īrate
9.085.07c     pávamānā abhí arṣanti suṣṭutím
9.085.07d     éndraṃ viśanti madirā^́sa índavaḥ

9.085.08a     pávamāno abhí arṣā suvī^́riyam
9.085.08b     urvī^́ṃ gávyūtim máhi śárma sapráthaḥ
9.085.08c     mā^́kir no asyá páriṣūtir īśata
9.085.08d     índo jáyema tuváyā dhánaṃ-dhanam

9.085.09a     ádhi dyā^́m asthād vr̥ṣabhó vicakṣaṇó
9.085.09b     árūrucad ví divó rocanā^́ kavíḥ
9.085.09c     rā^́jā pavítram áti eti róruvad
9.085.09d     diváḥ pīyū^́ṣaṃ duhate nr̥cákṣasaḥ

9.085.10a     divó nā^́ke mádhujihvā asaścáto
9.085.10b     venā^́ duhanti ukṣáṇaṃ giriṣṭhã^́m
9.085.10c     apsú drapsáṃ vāvr̥dhānáṃ samudrá ā^́
9.085.10d     síndhor ūrmā^́ mádhumantam pavítra ā^́

9.085.11a     nā^́ke suparṇám upapaptivā^́ṃsaṃ
9.085.11b     gíro venā^́nām akr̥panta pūrvī^́ḥ
9.085.11c     śíśuṃ rihanti matáyaḥ pánipnataṃ
9.085.11d     hiraṇyáyaṃ śakunáṃ kṣā^́maṇi sthā^́m

9.085.12a     ūrdhvó gandharvó ádhi nā^́ke asthād
9.085.12b     víśvā rūpā^́ praticákṣāṇo asya
9.085.12c     bhānúḥ śukréṇa śocíṣā ví adyaut
9.085.12d     prā^́rūrucad ródasī mātárā śúciḥ


9.086.01a     prá ta āśávaḥ pavamāna dhījávo
9.086.01b     mádā arṣanti raghujā^́ iva tmánā
9.086.01c     divyā^́ḥ suparṇā^́ mádhumanta índavo
9.086.01d     madíntamāsaḥ pári kóśam āsate

9.086.02a     prá te mádāso madirā^́sa āśávo
9.086.02b     ásr̥kṣata ráthiyāso yáthā pŕ̥thak
9.086.02c     dhenúr ná vatsám páyasābhí vajríṇam
9.086.02d     índram índavo mádhumanta ūrmáyaḥ

9.086.03a     átyo ná hyānó° abhí vā^́jam arṣa
9.086.03b     suvarvít kóśaṃ divó ádrimātaram
9.086.03c     vŕ̥ṣā pavítre ádhi sā^́no avyáye
9.086.03d     sómaḥ punāná indriyā^́ya dhā^́yase

9.086.04a     prá ta ā^́śvinīḥ pavamāna dhījúvo
9.086.04b     divyā^́ asr̥gran páyasā dhárīmaṇi
9.086.04c     prā^́ntár ŕ̥ṣaya sthā^́virīr asr̥kṣata
9.086.04d     yé tvā mr̥jánti r̥ṣiṣāṇa vedhásaḥ

9.086.05a     víśvā dhā^́māni viśvacakṣa ŕ̥bhvasaḥ
9.086.05b     prabhós te satáḥ pári yanti ketávaḥ
9.086.05c     viānaśíḥ pavase soma dhármabhiḥ
9.086.05d     pátir víśvasya bhúvanasya rājasi

9.086.06a     ubhayátaḥ pávamānasya raśmáyo
9.086.06b     dhruvásya satáḥ pári yanti ketávaḥ
9.086.06c     yádī pavítre ádhi mr̥jyáte háriḥ
9.086.06d     sáttā ní yónā kaláśeṣu sīdati

9.086.07a     yajñásya ketúḥ pavate suadhvaráḥ
9.086.07b     sómo devā^́nām úpa yāti niṣkr̥tám
9.086.07c     sahásradhāraḥ pári kóśam arṣati
9.086.07d     vŕ̥ṣā pavítram áti eti róruvat

9.086.08a     rā^́jā samudráṃ nadíyo ví gāhate
9.086.08b     apā^́m ūrmíṃ sacate síndhuṣu śritáḥ
9.086.08c     ádhy asthāt sā^́nu pávamāno avyáyaṃ
9.086.08d     nā^́bhā pr̥thivyā^́ dharúṇo mahó diváḥ

9.086.09a     divó ná sā^́nu stanáyann acikradad
9.086.09b     diyaúś ca yásya pr̥thivī^́ ca dhármabhiḥ
9.086.09c     índrasya sakhyám pavate vivévidat
9.086.09d     sómaḥ punānáḥ kaláśeṣu sīdati

9.086.10a     jyótir yajñásya pavate mádhu priyám
9.086.10b     pitā^́ devā^́nāṃ janitā^́ vibhū^́vasuḥ
9.086.10c     dádhāti rátnaṃ svadháyor apīcíyam
9.086.10d     madíntamo matsará indriyó rásaḥ

9.086.11a     abhikrándan kaláśaṃ vājī^́ arṣati
9.086.11b     pátir diváḥ śatádhāro vicakṣaṇáḥ
9.086.11c     hárir mitrásya sádaneṣu sīdati
9.086.11d     marmr̥jānó ávibhiḥ síndhubhir vŕ̥ṣā

9.086.12a     ágre síndhūnām pávamāno arṣati
9.086.12b     ágre vācó agriyó góṣu gachati
9.086.12c     ágre vā^́jasya bhajate mahādhanáṃ
9.086.12d     suāyudháḥ sotŕ̥bhiḥ pūyate vŕ̥ṣā

9.086.13a     ayám matávāñ chakunó yáthā hitó
9.086.13b     ávye sasāra pávamāna ūrmíṇā
9.086.13c     táva krátvā ródasī antarā^́ kave
9.086.13d     śúcir dhiyā^́ pavate sóma indra te

9.086.14a     drāpíṃ vásāno yajató divispŕ̥śam
9.086.14b     antarikṣaprā^́ bhúvaneṣu árpitaḥ
9.086.14c     súvar jajñānó nábhasābhí akramīt
9.086.14d     pratnám asya pitáram ā^́ vivāsati

9.086.15a     só asya viśé máhi śárma yachati
9.086.15b     yó asya dhā^́ma prathamáṃ viānaśé
9.086.15c     padáṃ yád asya paramé víomani
9.086.15d     áto víśvā abhí sáṃ yāti saṃyátaḥ

9.086.16a     pró ayāsīd índur índrasya niṣkr̥táṃ
9.086.16b     sákhā sákhyur ná prá mināti saṃgíram
9.086.16c     márya iva yuvatíbhiḥ sám arṣati
9.086.16d     sómaḥ kaláśe śatáyāmanā pathā^́

9.086.17a     prá vo dhíyo mandrayúvo vipanyúvaḥ
9.086.17b     panasyúvaḥ saṃvásaneṣu akramuḥ
9.086.17c     sómam manīṣā^́ abhy ànūṣata stúbho
9.086.17d     abhí dhenávaḥ páyasem aśiśrayuḥ

9.086.18a     ā^́ naḥ soma saṃyátam pipyúṣīm íṣam
9.086.18b     índo pávasva pávamāno asrídham
9.086.18c     yā^́ no dóhate trír áhann ásaścuṣī
9.086.18d     kṣumád vā^́javan mádhumad suvī^́riyam

9.086.19a     vŕ̥ṣā matīnā^́m pavate vicakṣaṇáḥ
9.086.19b     sómo áhnaḥ pratarītóṣáso diváḥ
9.086.19c     krāṇā^́ síndhūnāṃ kaláśām̐ avīvaśad
9.086.19d     índrasya hā^́rdi āviśán manīṣíbhiḥ

9.086.20a     manīṣíbhiḥ pavate pūrviyáḥ kavír
9.086.20b     nŕ̥bhir yatáḥ pári kóśām̐ acikradat
9.086.20c     tritásya nā^́ma janáyan mádhu kṣarad
9.086.20d     índrasya vāyóḥ sakhiyā^́ya kártave

9.086.21a     ayám punāná uṣáso ví rocayad
9.086.21b     ayáṃ síndhubhyo abhavad ulokakŕ̥t†
9.086.21c     ayáṃ tríḥ saptá duduhāná āśíraṃ
9.086.21d     sómo hr̥dé pavate cā^́ru matsaráḥ

9.086.22a     pávasva soma diviyéṣu dhā^́masu
9.086.22b     sr̥jāná indo kaláśe pavítra ā^́
9.086.22c     sī^́dann índrasya jaṭháre kánikradan
9.086.22d     nŕ̥bhir yatáḥ sū^́ryam ā^́rohayo diví

9.086.23a     ádribhiḥ sutáḥ pavase pavítra ā^́m̐
9.086.23b     índav índrasya jaṭháreṣu āviśán
9.086.23c     tuváṃ nr̥cákṣā abhavo vicakṣaṇa
9.086.23d     sóma gotrám áṅgirobhyo 'vr̥ṇor ápa

9.086.24a     tuvā^́ṃ soma pávamānaṃ suādhíyo
9.086.24b     ánu víprāso amadann avasyávaḥ
9.086.24c     tuvā^́ṃ suparṇá ā^́bharad divás pári
9.086.24d     índo víśvābhir matíbhiḥ páriṣkr̥tam

9.086.25a     ávye punānám pári vā^́ra ūrmíṇā
9.086.25b     háriṃ navante abhí saptá dhenávaḥ
9.086.25c     apā^́m upásthe ádhi āyávaḥ kavím
9.086.25d     r̥tásya yónā mahiṣā^́ aheṣata

9.086.26a     índuḥ punānó áti gāhate mŕ̥dho
9.086.26b     víśvāni kr̥ṇván supáthāni yájyave
9.086.26c     gā^́ḥ kr̥ṇvānó nirṇíjaṃ haryatáḥ kavír
9.086.26d     átyo ná krī^́ḷan pári vā^́ram arṣati

9.086.27a     asaścátaḥ śatádhārā abhiśríyo
9.086.27b     háriṃ navante áva tā^́ udanyúvaḥ
9.086.27c     kṣípo mr̥janti pári góbhir ā^́vr̥taṃ
9.086.27d     tr̥tī^́ye pr̥ṣṭhé ádhi rocané diváḥ

9.086.28a     távemā^́ḥ prajā^́ diviyásya rétasas
9.086.28b     tuváṃ víśvasya bhúvanasya rājasi
9.086.28c     áthedáṃ víśvam pavamāna te váśe
9.086.28d     tuvám indo prathamó dhāmadhā^́ asi

9.086.29a     tuváṃ samudró asi viśvavít kave
9.086.29b     távemā^́ḥ páñca pradíśo vídharmaṇi
9.086.29c     tuváṃ dyā^́ṃ ca pr̥thivī^́ṃ cā^́ti jabhriṣe
9.086.29d     táva jyótīṃṣi pavamāna sū^́riyaḥ

9.086.30a     tuvám pavítre rájaso vídharmaṇi
9.086.30b     devébhyaḥ soma pavamāna pūyase
9.086.30c     tuvā^́m uśíjaḥ prathamā^́ agr̥bhṇata
9.086.30d     túbhyemā^́ víśvā bhúvanāni yemire

9.086.31a     prá rebhá eti áti vā^́ram avyáyaṃ
9.086.31b     vŕ̥ṣā váneṣu áva cakradad dháriḥ
9.086.31c     sáṃ dhītáyo vāvaśānā^́ anūṣata
9.086.31d     śíśuṃ rihanti matáyaḥ pánipnatam

9.086.32a     sá sū^́riyasya raśmíbhiḥ pári vyata
9.086.32b     tántuṃ tanvānás trivŕ̥taṃ yáthā vidé
9.086.32c     náyann r̥tásya praśíṣo návīyasīḥ
9.086.32d     pátir jánīnām úpa yāti niṣkr̥tám

9.086.33a     rā^́jā síndhūnām pavate pátir divá
9.086.33b     r̥tásya yāti pathíbhiḥ kánikradat
9.086.33c     sahásradhāraḥ pári ṣicyate háriḥ
9.086.33d     punānó vā^́caṃ janáyann úpāvasuḥ

9.086.34a     pávamāna máhi árṇo ví dhāvasi
9.086.34b     sū^́ro ná citró ávyayāni pávyayā
9.086.34c     gábhastipūto nŕ̥bhir ádribhiḥ sutó
9.086.34d     mahé vā^́jāya dhániyāya dhanvasi

9.086.35a     íṣam ū^́rjam pavamānābhí arṣasi
9.086.35b     śyenó ná váṃsu kaláśeṣu sīdasi
9.086.35c     índrāya mádvā mádiyo mádaḥ sutó
9.086.35d     divó viṣṭambhá upamó vicakṣaṇáḥ

9.086.36a     saptá svásāro abhí mātáraḥ śíśuṃ
9.086.36b     návaṃ jajñānáṃ jéniyaṃ vipaścítam
9.086.36c     apā^́ṃ gandharváṃ diviyáṃ nr̥cákṣasaṃ
9.086.36d     sómaṃ víśvasya bhúvanasya rājáse

9.086.37a     īśāná imā^́ bhúvanāni vī^́yase
9.086.37b     yujāná indo harítaḥ suparṇíyaḥ
9.086.37c     tā^́s te kṣarantu mádhumad ghr̥tám páyas
9.086.37d     táva vraté soma tiṣṭhantu kr̥ṣṭáyaḥ

9.086.38a     tuváṃ nr̥cákṣā asi soma viśvátaḥ
9.086.38b     pávamāna vr̥ṣabha tā^́ ví dhāvasi
9.086.38c     sá naḥ pavasva vásumad dhíraṇyavad
9.086.38d     vayáṃ siyāma bhúvaneṣu jīváse

9.086.39a     govít pavasva vasuvíd dhiraṇyavíd
9.086.39b     retodhā^́ indo bhúvaneṣu árpitaḥ
9.086.39c     tuváṃ suvī^́ro asi soma viśvavít
9.086.39d     táṃ tvā víprā úpa girémá āsate

9.086.40a     ún mádhva ūrmír vanánā atiṣṭhipad
9.086.40b     apó vásāno mahiṣó ví gāhate
9.086.40c     rā^́jā pavítraratho vā^́jam ā^́ruhat
9.086.40d     sahásrabhr̥ṣṭir jayati śrávo br̥hát

9.086.41a     sá bhandánā úd iyarti prajā^́vatīr
9.086.41b     viśvā^́yur víśvāḥ subhárā áhardivi
9.086.41c     bráhma prajā^́vad rayím áśvapastiyam
9.086.41d     pītá indav índram asmábhya° yācatāt

9.086.42a     só ágre áhnāṃ hárir haryató mádaḥ
9.086.42b     prá cétasā cetayate ánu dyúbhiḥ
9.086.42c     duvā^́ jánā yātáyann antár īyate
9.086.42d     nárā ca śáṃsaṃ daíviyaṃ ca dhartári

9.086.43a     añjáte · ví añjate sám añjate
9.086.43b     krátuṃ rihanti mádhunābhí añjate
9.086.43c     síndhor ucchvāsé patáyantam ukṣáṇaṃ
9.086.43d     hiraṇyapāvā^́ḥ paśúm āsu gr̥bhṇate

9.086.44a     vipaścíte pávamānāya gāyata
9.086.44b     mahī^́ ná dhā^́rā áti ándho arṣati
9.086.44c     áhir ná jūrṇā^́m áti sarpati tvácam
9.086.44d     átyo ná krī^́ḷann asarad vŕ̥ṣā háriḥ

9.086.45a     agregó rā^́jā ápiyas taviṣyate
9.086.45b     vimā^́no áhnām bhúvaneṣu árpitaḥ
9.086.45c     hárir ghr̥tásnuḥ sudŕ̥śīko arṇavó
9.086.45d     jyotī^́rathaḥ pavate rāyá okíyaḥ

9.086.46a     ásarji skambhó divá údyato mádaḥ
9.086.46b     pári tridhā^́tur bhúvanāni arṣati
9.086.46c     aṃśúṃ rihanti matáyaḥ pánipnataṃ
9.086.46d     girā^́ yádi nirṇíjam r̥gmíṇo yayúḥ

9.086.47a     prá te dhā^́rā áti áṇvāni meṣíyaḥ
9.086.47b     punānásya saṃyáto yanti ráṃhayaḥ
9.086.47c     yád góbhir indo camúvoḥ samajyása
9.086.47d     ā^́ svānáḥ° soma kaláśeṣu sīdasi

9.086.48a     pávasva soma kratuvín na ukthiyó
9.086.48b     ávyo vā^́re pári dhāva mádhu priyám
9.086.48c     jahí víśvān rakṣása indo atríṇo
9.086.48d     br̥hád vadema vidáthe suvī^́rāḥ


9.087.01a     prá tú drava pári kóśaṃ ní ṣīda
9.087.01b     nŕ̥bhiḥ punānó abhí vā^́jam arṣa
9.087.01c     áśvaṃ ná tvā vājínam marjáyanto
9.087.01d     áchā barhī^́ raśanā^́bhir nayanti

9.087.02a     suāyudháḥ pavate devá índur
9.087.02b     aśastihā^́ vr̥jánaṃ rákṣamāṇaḥ
9.087.02c     pitā^́ devā^́nāṃ janitā^́ sudákṣo
9.087.02d     viṣṭambhó divó dharúṇaḥ pr̥thivyā^́ḥ

9.087.03a     ŕ̥ṣir vípraḥ puraetā^́ jánānām
9.087.03b     r̥bhúr dhī^́ra uśánā kā^́viyena
9.087.03c     sá cid viveda níhitaṃ yád āsām
9.087.03d     apīcíyaṃ gúhiyaṃ nā^́ma gónām

9.087.04a     eṣá syá te mádhumām̐ indra sómo
9.087.04b     vŕ̥ṣā vŕ̥ṣṇe pári pavítre akṣāḥ
9.087.04c     sahasrasā^́ḥ śatasā^́ bhūridā^́vā
9.087.04d     śaśvattamám barhír ā^́ vājī^́ asthāt

9.087.05a     eté sómā abhí gavyā^́ sahásrā
9.087.05b     mahé vā^́jāyām ŕ̥tāya śrávāṃsi
9.087.05c     pavítrebhiḥ pávamānā asr̥grañ
9.087.05d     chravasyávo ná pr̥tanā^́jo átyāḥ

9.087.06a     pári hí ṣmā puruhūtó jánānāṃ
9.087.06b     víśvā^́sarad bhójanā pūyámānaḥ
9.087.06c     áthā^́ bhara śyenabhr̥ta práyāṃsi
9.087.06d     rayíṃ túñjāno abhí vā^́jam arṣa

9.087.07a     eṣá svānáḥ° pári sómaḥ pavítre
9.087.07b     sárgo ná sr̥ṣṭó adadhāvad árvā
9.087.07c     tigmé śíśāno mahiṣó ná śŕ̥ṅge
9.087.07d     gã^́ gavyánn abhí śū^́ro ná sátvā

9.087.08a     eṣā^́ yayau paramā^́d antár ádreḥ
9.087.08b     kū^́cit satī^́r ūruvé gā^́ viveda
9.087.08c     divó ná vidyút stanáyanti abhraíḥ
9.087.08d     sómasya te pavata indra dhā^́rā

9.087.09a     utá sma rāśím pári yāsi gónām
9.087.09b     índreṇa soma sarátham punānáḥ
9.087.09c     pūrvī^́r íṣo br̥hatī^́r jīradāno
9.087.09d     śíkṣā śacīvas táva tā^́ upaṣṭút


9.088.01a     ayáṃ sóma indara⁺ túbhya° sunve
9.088.01b     túbhyam pavate tuvám asya pāhi
9.088.01c     tuváṃ ha yáṃ cakr̥ṣé tváṃ vavr̥ṣá
9.088.01d     índum mádāya yújiyāya sómam

9.088.02a     sá īṃ rátho ná bhuriṣā^́ḷ ayoji
9.088.02b     maháḥ purū^́ṇi sātáye vásūni
9.088.02c     ā^́d īṃ víśvā nahuṣíyāṇi jātā^́
9.088.02d     súvarṣātā vána ūrdhvā^́ navanta

9.088.03a     vāyúr ná yó niyútvām̐ iṣṭáyāmā
9.088.03b     nā^́satyeva háva ā^́ śámbhaviṣṭhaḥ
9.088.03c     viśvávāro draviṇodā^́ iva tmán
9.088.03d     pūṣā^́ iva dhījávano 'si soma

9.088.04a     índro ná yó mahā^́ kármāṇi cákrir
9.088.04b     hantā^́ vr̥trā^́ṇām asi soma pūrbhít
9.088.04c     paidvó ná hí tvám áhināmnāṃ
9.088.04d     hantā^́ víśvasya asi soma dásyoḥ

9.088.05a     agnír ná yó vána ā^́ sr̥jyámāno
9.088.05b     vŕ̥thā pā^́jāṃsi kr̥ṇute nadī^́ṣu
9.088.05c     jáno ná yúdhvā mahatá upabdír
9.088.05d     íyarti sómaḥ pávamāna ūrmím

9.088.06a     eté sómā áti vā^́rāṇi ávyā
9.088.06b     diviyā^́ ná kóśāso abhrávarṣāḥ
9.088.06c     vŕ̥thā samudráṃ síndhavo ná nī^́cīḥ
9.088.06d     sutā^́so abhí kaláśām̐ asr̥gran

9.088.07a     śuṣmī^́ śárdho ná mā^́rutam pavasva
9.088.07b     ánabhiśastā diviyā^́ yáthā víṭ
9.088.07c     ā^́po ná makṣū^́ sumatír bhavā naḥ
9.088.07d     sahásrāpsāḥ pr̥tanāṣā^́ṇ ná yajñáḥ

9.088.08a     rā^́jño nú te váruṇasya vratā^́ni
9.088.08b     br̥hád gabhīráṃ táva soma dhā^́ma
9.088.08c     śúciṣ ṭuvám asi priyó ná mitró
9.088.08d     dakṣā^́yiyo aryamévāsi soma


9.089.01a     prá ū syá váhniḥ pathíyābhir asyān
9.089.01b     divó ná vr̥ṣṭíḥ pávamāno akṣāḥ
9.089.01c     sahásradhāro asadan ní asmé
9.089.01d     mātúr upásthe vána ā^́ ca sómaḥ

9.089.02a     rā^́jā síndhūnām avasiṣṭa vā^́sa
9.089.02b     r̥tásya nā^́vam ā^́ruhad rájiṣṭhām
9.089.02c     apsú drapsó vāvr̥dhe śyenájūto
9.089.02d     duhá īm pitā^́ duhá īm pitúr jā^́m

9.089.03a     siṃháṃ nasanta mádhuvo ayā^́saṃ
9.089.03b     hárim aruṣáṃ divó asyá pátim
9.089.03c     śū^́ro yutsú prathamáḥ pr̥chate gā^́
9.089.03d     ásya cákṣasā pári pāti ukṣā^́

9.089.04a     mádhupr̥ṣṭhaṃ ghorám ayā^́sam áśvaṃ
9.089.04b     ráthe yuñjanti urucakrá r̥ṣvám
9.089.04c     svásāra īṃ jāmáyo marjayanti
9.089.04d     sánābhayo vājínam ūrjayanti

9.089.05a     cátasra īṃ ghr̥tadúhaḥ sacante
9.089.05b     samāné antár dharúṇe níṣattāḥ
9.089.05c     tā^́ īm arṣanti námasā punānā^́s
9.089.05d     tā^́ īṃ viśvátaḥ pári ṣanti pūrvī^́ḥ

9.089.06a     viṣṭambhó divó dharúṇaḥ pr̥thivyā^́
9.089.06b     víśvā utá kṣitáyo háste asya
9.089.06c     ásat ta útso gr̥ṇaté niyútvān
9.089.06d     mádhvo aṃśúḥ pavata indriyā^́ya

9.089.07a     vanvánn ávāto abhí devávītim
9.089.07b     índrāya soma vr̥trahā^́ pavasva
9.089.07c     śagdhí maháḥ puruścandrásya rāyáḥ
9.089.07d     suvī^́riyasya pátayaḥ siyāma


9.090.01a     prá hinvānó janitā^́ ródasīyo
9.090.01b     rátho ná vā^́jaṃ saniṣyánn ayāsīt
9.090.01c     índraṃ gáchann ā^́yudhā saṃśíśāno
9.090.01d     víśvā vásu hástayor ādádhānaḥ

9.090.02a     abhí tripr̥ṣṭháṃ vŕ̥ṣaṇaṃ vayodhā^́m
9.090.02b     āṅgūṣā^́ṇām avāvaśanta vā^́ṇīḥ
9.090.02c     vánā vásāno váruṇo ná síndhūn
9.090.02d     ví ratnadhā^́ dayate vā^́riyāṇi

9.090.03a     śū^́ragrāmaḥ sárvavīraḥ sáhāvāñ
9.090.03b     jétā pavasva sánitā dhánāni
9.090.03c     tigmā^́yudhaḥ kṣiprádhanvā samátsu
9.090.03d     áṣāḷhaḥ sāhvā^́n pŕ̥tanāsu śátrūn

9.090.04a     urúgavyūtir ábhayāni kr̥ṇván
9.090.04b     samīcīné ā^́ pavasvā púraṃdhī
9.090.04c     apáḥ síṣāsann uṣásaḥ súvar gā^́ḥ
9.090.04d     sáṃ cikrado mahó asmábhya° vā^́jān

9.090.05a     mátsi soma váruṇam mátsi mitrám
9.090.05b     mátsī^́ndram indo pavamāna víṣṇum
9.090.05c     mátsi śárdho mā^́rutam mátsi devā^́n
9.090.05d     mátsi mahā^́m índram indo mádāya

9.090.06a     evā^́ rā^́jeva krátumām̐ ámena
9.090.06b     víśvā ghánighnad duritā^́ pavasva
9.090.06c     índo sūktā^́ya vácase váyo dhā
9.090.06d     yūyám pāta suastíbhiḥ sádā naḥ


9.091.01a     ásarji vákvā ráthiye yáthājaú
9.091.01b     dhiyā^́ manótā prathamó manīṣī^́
9.091.01c     dáśa svásāro ádhi sā^́no ávye
9.091.01d     ájanti váhniṃ sádanāni ácha

9.091.02a     vītī^́ jánasya diviyásya kavyaír
9.091.02b     ádhi svānó° nahuṣíyebhir índuḥ
9.091.02c     prá yó nŕ̥bhir amŕ̥to mártiyebhir
9.091.02d     marmr̥jānó ávibhir góbhir adbhíḥ

9.091.03a     vŕ̥ṣā vŕ̥ṣṇe róruvad aṃśúr asmai
9.091.03b     pávamāno rúśad īrte páyo góḥ
9.091.03c     sahásram ŕ̥kvā pathíbhir vacovíd
9.091.03d     adhvasmábhiḥ sū^́ro áṇvaṃ ví yāti

9.091.04a     rujā^́ dr̥̄ḷhā^́+ cid rakṣásaḥ sádāṃsi
9.091.04b     punāná inda ūrṇuhi ví vā^́jān
9.091.04c     vr̥ścópáriṣṭāt tujatā^́ vadhéna
9.091.04d     yé ánti dūrā^́d upanāyám eṣām

9.091.05a     sá pratnaván návyase viśvavāra
9.091.05b     suuktā^́ya patháḥ kr̥ṇuhi prā^́caḥ
9.091.05c     yé duḥṣáhāso vanúṣā br̥hántas
9.091.05d     tā^́ṃs te aśyāma purukr̥t purukṣo

9.091.06a     evā^́ punānó apáḥ súvar gā^́
9.091.06b     asmábhyaṃ tokā^́ tánayāni bhū^́ri
9.091.06c     śáṃ naḥ kṣétram urú jyótīṃṣi soma
9.091.06d     jiyóṅ naḥ sū^́ryaṃ dr̥śáye rirīhi


9.092.01a     pári svānó° hárir aṃśúḥ pavítre
9.092.01b     rátho ná sarji sanáye hiyānáḥ
9.092.01c     ā^́pac chlókam indriyám pūyámānaḥ
9.092.01d     práti devā^́m̐ ajuṣata práyobhiḥ

9.092.02a     áchā nr̥cákṣā asarat pavítre
9.092.02b     nā^́ma dádhānaḥ kavír asya yónau
9.092.02c     sī^́dan hóteva sádane camū^́ṣu
9.092.02d     úpem agmann ŕ̥ṣayaḥ saptá víprāḥ

9.092.03a     prá sumedhā^́ gātuvíd viśvádevaḥ
9.092.03b     sómaḥ punānáḥ sáda eti nítyam
9.092.03c     bhúvad víśveṣu kā^́viyeṣu rántā
9.092.03d     ánu jánān yatate páñca dhī^́raḥ

9.092.04a     táva tyé soma pavamāna niṇyé
9.092.04b     víśve devā^́s tráya ekādaśā^́saḥ
9.092.04c     dáśa svadhā^́bhir ádhi sā^́no ávye
9.092.04d     mr̥jánti tvā nadíyaḥ saptá yahvī^́ḥ

9.092.05a     tán nú satyám pávamānasya astu
9.092.05b     yátra víśve kārávaḥ saṃnásanta
9.092.05c     jyótir yád áhne ákr̥ṇod ulokám†
9.092.05d     prā^́van mánuṃ dásyave kar abhī^́kam

9.092.06a     pári sádmeva paśumā^́nti hótā
9.092.06b     rā^́jā ná satyáḥ sámitīr iyānáḥ
9.092.06c     sómaḥ punānáḥ kaláśām̐ ayāsīt
9.092.06d     sī^́dan mr̥gó ná mahiṣó váneṣu


9.093.01a     sākamúkṣo marjayanta svásāro
9.093.01b     dáśa dhī^́rasya dhītáyo dhánutrīḥ
9.093.01c     háriḥ páry adravaj jā^́ḥ sū^́riyasya
9.093.01d     dróṇaṃ nanakṣe átiyo ná vājī^́

9.093.02a     sám mātŕ̥bhir ná śíśur vāvaśānó
9.093.02b     vŕ̥ṣā dadhanve puruvā^́ro adbhíḥ
9.093.02c     máryo ná yóṣām abhí niṣkr̥táṃ yán
9.093.02d     sáṃ gachate kaláśa usríyābhiḥ

9.093.03a     utá prá pipya ū^́dhar ághniyāyā
9.093.03b     índur dhā^́rābhiḥ sacate sumedhā^́ḥ
9.093.03c     mūrdhā^́naṃ gā^́vaḥ páyasā camū^́ṣu
9.093.03d     abhí śrīṇanti vásubhir ná niktaíḥ

9.093.04a     sá no devébhiḥ pavamāna rada
9.093.04b     índo rayím aśvínaṃ vāvaśānáḥ
9.093.04c     rathirāyátām uśatī^́ púraṃdhir
9.093.04d     asmadríag ā^́ dāváne vásūnām

9.093.05a     nū^́ no rayím úpa māsva nr̥vántam
9.093.05b     punānó vãtā^́pyaṃ viśváścandram
9.093.05c     prá vanditúr · indo tāri ā^́yuḥ
9.093.05d     prātár makṣū^́ dhiyā^́vasur jagamyāt


9.094.01a     ádhi yád asmin vājínīva śúbha
9.094.01b     spárdhante dhíyaḥ sū^́riye ná víśaḥ
9.094.01c     apó vr̥ṇānáḥ pavate kavīyán
9.094.01d     vrajáṃ ná paśuvárdhanāya mánma

9.094.02a     dvitā^́ viūrṇvánn amŕ̥tasya dhā^́ma
9.094.02b     suvarvíde bhúvanāni prathanta
9.094.02c     dhíyaḥ pinvānā^́ḥ svásare ná gā^́va
9.094.02d     r̥tāyántīr abhí vāvaśra índum

9.094.03a     pári yát kavíḥ kā^́viyā bhárate
9.094.03b     śū^́ro ná rátho bhúvanāni víśvā
9.094.03c     devéṣu yáśo mártiāya° bhū^́ṣan
9.094.03d     dákṣāya rāyáḥ purubhū^́ṣu návyaḥ

9.094.04a     śriyé jātáḥ śriyá ā^́ nír iyāya
9.094.04b     śríyaṃ váyo jaritŕ̥bhyo dadhāti
9.094.04c     śríyaṃ vásānā amr̥tatvám āyan
9.094.04d     bhávanti satyā^́ samithā^́ mitádrau

9.094.05a     íṣam ū^́rjam abhí arṣā^́śuvaṃ gā^́m
9.094.05b     urú jyótiḥ kr̥ṇuhi mátsi devā^́n
9.094.05c     víśvāni hí suṣáhā tā^́ni túbhyam
9.094.05d     pávamāna bā^́dhase soma śátrūn


9.095.01a     kánikranti hárir ā^́ sr̥jyámānaḥ
9.095.01b     sī^́dan vánasya jaṭháre punānáḥ
9.095.01c     nŕ̥bhir yatáḥ kr̥ṇute nirṇíjaṃ gā^́
9.095.01d     áto matī^́r janayata svadhā^́bhiḥ

9.095.02a     háriḥ sr̥jānáḥ pathíyām r̥tásya
9.095.02b     íyarti vā^́cam aritéva nā^́vam
9.095.02c     devó devā^́nāṃ gúhiyāni nā^́ma
9.095.02d     āvíṣ kr̥ṇoti barhíṣi pravā^́ce

9.095.03a     apā^́m ivéd ūrmáyas tárturāṇāḥ
9.095.03b     prá manīṣā^́ īrate sómam ácha
9.095.03c     namasyántīr úpa ca yánti sáṃ ca
9.095.03d     ā^́ ca viśanti uśatī^́r uśántam

9.095.04a     tám marmr̥jānám mahiṣáṃ ná sā^́nā
9.095.04b     aṃśúṃ duhanti ukṣáṇaṃ giriṣṭhā^́m
9.095.04c     táṃ vāvaśānám matáyaḥ sacante
9.095.04d     tritó bibharti váruṇaṃ samudré

9.095.05a     íṣyan vā^́cam upavaktéva hótuḥ
9.095.05b     punāná indo ví ṣiyā manīṣā^́m
9.095.05c     índraś ca yát kṣáyathaḥ saúbhagāya
9.095.05d     suvī^́riyasya pátayaḥ siyāma


9.096.01a     prá senānī^́ḥ śū^́ro ágre ráthānāṃ
9.096.01b     gavyánn eti hárṣate asya sénā
9.096.01c     bhadrā^́n kr̥ṇvánn indrahavā^́n sákhibhya
9.096.01d     ā^́ sómo vástrā rabhasā^́ni datte

9.096.02a     sám asya háriṃ hárayo mr̥janti
9.096.02b     aśvahayaír ániśitaṃ námobhiḥ
9.096.02c     ā^́ tiṣṭhati rátham índrasya sákhā
9.096.02d     vidvā^́m̐ enā sumatíṃ yāti ácha

9.096.03a     sá no deva devátāte pavasva
9.096.03b     mahé soma psárasa indrapā^́naḥ
9.096.03c     kr̥ṇvánn apó varṣáyan dyā^́m utémā^́m
9.096.03d     urór ā^́ no varivasyā punānáḥ

9.096.04a     ájītaye áhataye pavasva
9.096.04b     svastáye sarvátātaye br̥haté
9.096.04c     tád uśanti víśva imé sákhāyas
9.096.04d     tád aháṃ vaśmi pavamāna soma

9.096.05a     sómaḥ pavate janitā^́ matīnā^́ṃ
9.096.05b     janitā^́ divó janitā^́ pr̥thivyā^́ḥ
9.096.05c     janitā^́gnér janitā^́ sū^́riyasya
9.096.05d     janiténdrasya janitótá víṣṇoḥ

9.096.06a     brahmā^́ devā^́nām padavī^́ḥ kavīnā^́m
9.096.06b     ŕ̥ṣir víprāṇām mahiṣó mr̥gā^́ṇām
9.096.06c     śyenó gŕ̥dhrāṇāṃ svádhitir vánānāṃ
9.096.06d     sómaḥ pavítram áti eti rébhan

9.096.07a     prā^́vīvipad vācá ūrmíṃ ná síndhur
9.096.07b     gíraḥ sómaḥ pávamāno manīṣā^́ḥ
9.096.07c     antáḥ páśyan vr̥jánemā^́varāṇi
9.096.07d     ā^́ tiṣṭhati vr̥ṣabhó góṣu jānán

9.096.08a     sá matsaráḥ pr̥tsú vanvánn ávātaḥ
9.096.08b     sahásraretā abhí vā^́jam arṣa
9.096.08c     índrāyendo pávamāno manīṣī^́
9.096.08d     aṃśór ūrmím īraya gā^́ iṣaṇyán

9.096.09a     pári priyáḥ kaláśe devávāta
9.096.09b     índrāya sómo ráṇiyo mádāya
9.096.09c     sahásradhāraḥ śatávāja índur
9.096.09d     vājī^́ ná sáptiḥ sámanā jigāti

9.096.10a     sá pūrviyó vasuvíj jā^́yamāno
9.096.10b     mr̥jānó apsú duduhānó ádrau
9.096.10c     abhiśastipā^́ bhúvanasya rā^́jā
9.096.10d     vidád gātúm bráhmaṇe pūyámānaḥ

9.096.11a     tváyā hí naḥ pitáraḥ soma pū^́rve
9.096.11b     kármāṇi cakrúḥ pavamāna dhī^́rāḥ
9.096.11c     vanvánn ávātaḥ paridhī^́m̐r áporṇu
9.096.11d     vīrébhir áśvair maghávā bhavā naḥ

9.096.12a     yáthā^́pavathā mánave vayodhā^́
9.096.12b     amitrahā^́ varivovíd dhavíṣmān
9.096.12c     evā^́ pavasva dráviṇaṃ dádhāna
9.096.12d     índre sáṃ tiṣṭha janáyā^́yudhāni

9.096.13a     pávasva soma mádhumām̐ r̥tā^́vā
9.096.13b     apó vásāno ádhi sā^́no ávye
9.096.13c     áva dróṇāni ghr̥távānti sīda
9.096.13d     madíntamo matsará indrapā^́naḥ

9.096.14a     vr̥ṣṭíṃ diváḥ śatádhāraḥ pavasva
9.096.14b     sahasrasā^́ vājayúr devávītau
9.096.14c     sáṃ síndhubhiḥ kaláśe vāvaśānáḥ
9.096.14d     sám usríyābhiḥ pratirán na ā^́yuḥ

9.096.15a     eṣá syá sómo matíbhiḥ punānó
9.096.15b     átyo ná vājī^́ táratī^́d árātīḥ
9.096.15c     páyo ná dugdhám áditer iṣirám
9.096.15d     urv ìva gātúḥ suyámo ná vóḷhā

9.096.16a     suāyudháḥ sotŕ̥bhiḥ pūyámāno
9.096.16b     abhí arṣa gúhiyaṃ cā^́ru nā^́ma
9.096.16c     abhí vā^́jaṃ sáptir iva śravasyā^́
9.096.16d     abhí vāyúm abhí gā^́ deva soma

9.096.17a     śíśuṃ jajñānáṃ haryatám mr̥janti
9.096.17b     śumbhánti váhnim marúto gaṇéna
9.096.17c     kavír gīrbhíḥ kā^́viyenā kavíḥ sán
9.096.17d     sómaḥ pavítram áti eti rébhan

9.096.18a     ŕ̥ṣimanā yá r̥ṣikŕ̥t suvarṣā^́ḥ
9.096.18b     sahásraṇīthaḥ padavī^́ḥ kavīnā^́m
9.096.18c     tr̥tī^́yaṃ dhā^́ma mahiṣáḥ síṣāsan
9.096.18d     sómo virā^́jam ánu rājati ṣṭúp

9.096.19a     camūṣác chyenáḥ śakunó vibhŕ̥tvā
9.096.19b     govindúr drapsá ā^́yudhāni bíbhrat
9.096.19c     apā^́m ūrmíṃ sácamānaḥ samudráṃ
9.096.19d     turī^́yaṃ dhā^́ma mahiṣó vivakti

9.096.20a     máryo ná śubhrás tanúvam mr̥jānó
9.096.20b     átyo ná sŕ̥tvā sanáye dhánānām
9.096.20c     vŕ̥ṣeva yūthā^́ pári kóśam árṣan
9.096.20d     kánikradac camúvor ā^́ viveśa

9.096.21a     pávasvendo pávamāno máhobhiḥ
9.096.21b     kánikradat pári vā^́rāṇi arṣa
9.096.21c     krī^́ḷañ camvòr ā^́ viśa pūyámāna
9.096.21d     índraṃ te ráso madiró mamattu

9.096.22a     prá asya dhā^́rā br̥hatī^́r asr̥grann
9.096.22b     aktó góbhiḥ kaláśām̐ ā^́ viveśa
9.096.22c     sā^́ma kr̥ṇván sāmaníyo vipaścít
9.096.22d     krándann eti abhí sákhyur ná jāmím

9.096.23a     apaghnánn eṣi pavamāna śátrūn
9.096.23b     priyā^́ṃ ná jāró abhígīta índuḥ
9.096.23c     sī^́dan váneṣu śakunó ná pátvā
9.096.23d     sómaḥ punānáḥ kaláśeṣu sáttā

9.096.24a     ā^́ te rúcaḥ pávamānasya soma
9.096.24b     yóṣeva yanti sudúghāḥ sudhārā^́ḥ
9.096.24c     hárir ā^́nītaḥ puruvā^́ro apsú
9.096.24d     ácikradat kaláśe devayūnā^́m


9.097.01a     asyá preṣā^́ hemánā pūyámāno
9.097.01b     devó devébhiḥ sám apr̥kta rásam
9.097.01c     sutáḥ pavítram pári eti rébhan
9.097.01d     mitéva sádma paśumā^́nti hótā

9.097.02a     bhadrā^́ vástrā samaníyā vásāno
9.097.02b     mahā^́n kavír nivácanāni śáṃsan
9.097.02c     ā^́ vacyasva camúvoḥ pūyámāno
9.097.02d     vicakṣaṇó jā^́gr̥vir devávītau

9.097.03a     sám u priyó mr̥jyate sā^́no ávye
9.097.03b     yaśástaro yaśásāṃ kṣaíto asmé
9.097.03c     abhí svara dhánuvā pūyámāno
9.097.03d     yūyám pāta suastíbhiḥ sádā naḥ

9.097.04a     prá gāyata abhí arcāma devā^́n
9.097.04b     sómaṃ hinota mahaté dhánāya
9.097.04c     svādúḥ pavāte áti vā^́ram ávyam
9.097.04d     ā^́ sīdāti kaláśaṃ devayúr naḥ

9.097.05a     índur devā^́nām úpa sakhyám āyán
9.097.05b     sahásradhāraḥ pavate mádāya
9.097.05c     nŕ̥bhi stávāno ánu dhā^́ma pū^́rvam
9.097.05d     ágann índram mahaté saúbhagāya

9.097.06a     stotré rāyé hárir arṣā punāná
9.097.06b     índram mádo gachatu te bhárāya
9.097.06c     devaír yāhi saráthaṃ rā^́dho áchā
9.097.06d     yūyám pāta suastíbhiḥ sádā naḥ

9.097.07a     prá kā^́viyam uśáneva bruvāṇó
9.097.07b     devó devā^́nāṃ jánimā vivakti
9.097.07c     máhivrataḥ śúcibandhuḥ pavākáḥ⁺
9.097.07d     padā^́ varāhó abhí eti rébhan

9.097.08a     prá haṃsā^́sas tr̥pálam manyúm ácha
9.097.08b     amā^́d ástaṃ vŕ̥ṣagaṇā ayāsuḥ
9.097.08c     āṅgūṣíyam pávamānaṃ sákhāyo
9.097.08d     durmárṣaṃ sākám prá vadanti vāṇám

9.097.09a     sá raṃhata urugāyásya jūtíṃ
9.097.09b     vŕ̥thā krī^́ḷantam mimate ná gā^́vaḥ
9.097.09c     parīṇasáṃ kr̥ṇute tigmáśr̥ṅgo
9.097.09d     dívā hárir dádr̥śe náktam r̥jráḥ

9.097.10a     índur vājī^́ pavate gónioghā
9.097.10b     índre sómaḥ sáha ínvan mádāya
9.097.10c     hánti rákṣo bā^́dhate páry árātīr
9.097.10d     várivaḥ kr̥ṇván vr̥jánasya rā^́jā

9.097.11a     ádha dhā^́rayā mádhuvā pr̥cānás
9.097.11b     tiró róma pavate ádridugdhaḥ
9.097.11c     índur índrasya sakhiyáṃ juṣāṇó
9.097.11d     devó devásya matsaró mádāya

9.097.12a     abhí priyā^́ṇi pavate punānó
9.097.12b     devó devā^́n svéna rásena pr̥ñcán
9.097.12c     índur dhármāṇi r̥tuthā^́ vásāno
9.097.12d     dáśa kṣípo avyata sā^́no ávye

9.097.13a     vŕ̥ṣā śóṇo abhikánikradad gā^́
9.097.13b     nadáyann eti pr̥thivī^́m utá dyā^́m
9.097.13c     índrasyeva vagnúr ā^́ śr̥ṇva ājaú
9.097.13d     pracetáyann arṣati vā^́cam émā^́m

9.097.14a     rasā^́yiyaḥ páyasā pínvamāna
9.097.14b     īráyann eṣi mádhumantam aṃśúm
9.097.14c     pávamānaḥ saṃtaním eṣi kr̥ṇvánn
9.097.14d     índrāya soma pariṣicyámānaḥ

9.097.15a     evā^́ pavasva madiró mádāya
9.097.15b     udagrābhásya namáyan vadhasnaíḥ
9.097.15c     pári várṇam bháramāṇo rúśantaṃ
9.097.15d     gavyúr no arṣa pári soma siktáḥ

9.097.16a     juṣṭvī^́ na indo supáthā sugā^́ni
9.097.16b     uraú pavasva várivāṃsi kr̥ṇván
9.097.16c     ghanéva víṣvag duritā^́ni vighnánn
9.097.16d     ádhi ṣṇúnā dhanuva sā^́no ávye

9.097.17a     vr̥ṣṭíṃ no arṣa diviyā^́ṃ jigatnúm
9.097.17b     íḷāvatīṃ śaṃgáyīṃ jīrádānum
9.097.17c     stúkeva vītā^́ dhanuvā vicinván
9.097.17d     bándhūm̐r imā^́m̐ ávarām̐ indo vāyū^́n

9.097.18a     granthíṃ ná ví ṣya grathitám punāná
9.097.18b     r̥júṃ ca gātúṃ vr̥jináṃ ca soma
9.097.18c     átyo ná krado hárir ā^́ sr̥jānó
9.097.18d     máryo deva dhanuva pastíyāvān

9.097.19a     júṣṭo mádāya devátāta indo
9.097.19b     pári ṣṇúnā dhanuva sā^́no ávye
9.097.19c     sahásradhāraḥ surabhír ádabdhaḥ
9.097.19d     pári srava vā^́jasātau nr̥ṣáhye

9.097.20a     araśmā^́no yé arathā^́ áyuktā
9.097.20b     átyāso ná sasr̥jānā^́sa ājaú
9.097.20c     eté śukrā^́so dhanuvanti sómā
9.097.20d     dévāsas tā^́m̐ úpa yātā píbadhyai

9.097.21a     evā^́ na indo abhí devávītim
9.097.21b     pári srava nábho árṇaś camū^́ṣu
9.097.21c     sómo asmábhyaṃ kā^́miyam br̥hántaṃ
9.097.21d     rayíṃ dadātu vīrávantam ugrám

9.097.22a     tákṣad yádī mánaso vénato vā^́g
9.097.22b     jyéṣṭhasya vā dhármaṇi kṣór ánīke
9.097.22c     ā^́d īm āyan váram ā^́ vāvaśānā^́
9.097.22d     júṣṭam pátiṃ kaláśe gā^́va índum

9.097.23a     prá dānudó diviyó dānupinvá
9.097.23b     r̥tám r̥tā^́ya pavate sumedhā^́ḥ
9.097.23c     dharmā^́ bhuvad vr̥janíyasya rā^́jā
9.097.23d     prá raśmíbhir daśábhir bhāri bhū^́ma

9.097.24a     pavítrebhiḥ pávamāno nr̥cákṣā
9.097.24b     rā^́jā devā^́nām utá mártiyānām
9.097.24c     dvitā^́ bhuvad rayipátī rayīṇā^́m
9.097.24d     r̥tám bharat súbhr̥taṃ cā^́ru índuḥ

9.097.25a     árvām̐ iva śrávase sātím ácha
9.097.25b     índrasya vāyór abhí vītím arṣa
9.097.25c     sá naḥ sahásrā br̥hatī^́r íṣo dā
9.097.25d     bhávā soma draviṇovít punānáḥ

9.097.26a     devāvíyo naḥ pariṣicyámānāḥ
9.097.26b     kṣáyaṃ suvī^́raṃ dhanuvantu sómāḥ
9.097.26c     āyajyávaḥ sumatíṃ viśvávārā
9.097.26d     hótāro ná diviyájo mandrátamāḥ

9.097.27a     evā^́ deva devátāte pavasva
9.097.27b     mahé soma psárase devapā^́naḥ
9.097.27c     maháś cid dhí ṣmási hitā^́ḥ samaryé
9.097.27d     kr̥dhí suṣṭhāné ródasī punānáḥ

9.097.28a     áśvo ná krado vŕ̥ṣabhir yujānáḥ
9.097.28b     siṃhó ná bhīmó mánaso jávīyān
9.097.28c     arvācī^́naiḥ pathíbhir yé rájiṣṭhā
9.097.28d     ā^́ pavasva saumanasáṃ na indo

9.097.29a     śatáṃ dhā^́rā devájātā asr̥gran
9.097.29b     sahásram enāḥ kaváyo mr̥janti
9.097.29c     índo sanítraṃ divá ā^́ pavasva
9.097.29d     puraetā^́si maható dhánasya

9.097.30a     divó ná sárgā asasr̥gram áhnāṃ
9.097.30b     rā^́jā ná mitrám prá mināti dhī^́raḥ
9.097.30c     pitúr ná putráḥ krátubhir yatāná
9.097.30d     ā^́ pavasva viśé asyā^́ ájītim

9.097.31a     prá te dhā^́rā mádhumatīr asr̥gran
9.097.31b     vā^́rān yát pūtó atiéṣi ávyān
9.097.31c     pávamāna pávase dhā^́ma gónāṃ
9.097.31d